Online Reporter
Nkosilathi Sibanda
KUMIDLALO emine ezibambile njengomqeqetshi, uTry Ncube usenqobe kowodwa.
NgoLwesihlanu iHighlanders idlale leTriangle kwaphetha kuyi 0-0, okudanise abalandeli abangene enkundleni, baqeda ihola lengxenye belinde ukuthi izabhobozela emambuleni.
Umqeqetshi lo uthe iqembu lakhe licensing yokuthi kulezinsuku sekungathi kudlala umuntu oyedwa. Utsho lokhu ekhuluma ngoMafios Chihweta, umdlali otshibilika esiswini senkundla.
“Inhlanhla kayikho kithi. Kube ngomunye umdlalo lapho esidlalise khona amathuba amanengi okuhlohla. Siphoxekile kakhulu, kutsho uNcube, ekhuluma lentatheli ngemva komdlalo.
“UMafios ubezinikele. Udlale kuhle njalo ulesiphiwo. Abanye abadlali kumele basukumele phezulu ngoba sekungathi udlala yedwa. Kumele bamsekele.”
Kumdlalo wangoLwesine, iBosso ihambe phambili kusukela ngesigaba sakuqala. Iphose yahlohla ngomzuzu we-33, lapho umgadli uMvelo Khoza akhabe ibhola liqonde egedini, kodwa leqela phezulu kwamambule. Akuhlalanga isikhathi eside, iphinde yahlasela iHighlanders.
UChihweta uthole ibhola lisuka emuva, waliqhuba kakuhle, edlula ehwita, ereyitsha imvimbi zeTriangle, walibeka enyaweni zikaMarvin Sibanda, owehluleke ukuhambisa phambili. Ubelethuba elihle lokuhlohla kodwa ukuyekethisa kwakhe kudale ukuthi imvimbi zeTriangle zimthathele ibhola.
Khonapho nje, ababukeli bomdlalo, abangabalandeli beBosso batshaye ukhwelo, betshela uNcube ukuthi amkhiphe lumdlali.
USibanda usegconwe ngabalandeli nanko wakhutha umbekwa kumdlalo wabo leScottland benqotshwa 2-1, eRufaro.
Ngesikhathi sekhefu lomdlalo, uSibanda ukhitshiwe, kwangena uMason Mushore.
Omunye umdlali okhuthe ukuhlohla nguReason Sibanda ophiwe ibhola elihle esidikidikini segedi, endaweni yokuthi alifake phansi, ulikhabele eceleni. Bakhala njalo abalandeli, babalisa ukuthi iqembu selidlalelwa “ngamaxaba”.
Uphinde wabatshila umoya abalandeli lumdlali ngomzuzu wesi-67. UChihweta wenze esinye isimanga, ereyitsha kalula, enikeza ibhola kuSibanda, obeyedwa ekhangele igedi, walibeka phezulu kwegedi.
Okwakhathesi iHighlanders ihlezi kunombolo yesitshiya galombili ilemiklomelo engu-28, kumidlalo engu-22.
Impumela yemidlalo yeCastle Lager Premiership ngoLwesine:
Dynamos 0–0 Manica Diamonds
Highlanders 0-0 Triangle United
Bikita Minerals 0–1 Scottland FC
