Online Reporter
YiNtatheli kaMthunywa
ZISATSHWAQE imizimba izakhamizi zedolobheni leKadoma kulandela ukuzwa ngenye indoda okubikwa idobhe ingqamu yemkulwini yaxhonxa indodakazi yayo ebilenyanga eziyisificamunwe munye izithwele yaze yafa andubana iphendukele umkayo imgwaze entanyeni afe.
U-Obert Namurokosi oleminyaka engu-45, osesezandleni zamapholisa ubulele umkakhe kunye lendodakazi yakhe ngesihluku ngempelaviki.
Kubikwa uObert usebenzise ingqamu yemkulwini ukugwaza abulale umkakhe uCynthia Namukorosi (45) kunye lendodakazi yakhe uTakudzwa Namukorosi (23).
Abafakazi baveze ukuthi uObert ubesola umkakhe uCynthia, umbalisi eKaroi ngokungathembeki emtshadweni.
Isikhulumi samapholisa elizweni, uCommissioner Paul Nyathi uqinisekise ngesehlakalo lesi wabuye waveza ukuthi uObert usebotshiwe andubana axwayise uzulu ukuthi atshiye umkhuba wokuhlukumezana emakhaya.
“Njengamapholisa siqinisekisa ngokubotshwa kwendoda yeKadoma ethinteka kumacala amabili okubulala enzakala ngeSonto eVictory Park, eKadoma.
“Umetheswacala kucatshangelwa ukuba waba lengxabano lomkakhe owagijima wayacatsha endlini yendodakazi yakhe ngoMgqibelo.
“Ngosuku olulandelayo, umetheswacala wamlandela ethwele ingqamu yemkulwini wafika wabahlasela bonke.
“Wagwaza indodakazi yakhe eyayilenyanga eziyisificamunwe munye izithwele, kanengi andubana aphendukele umkakhe amgwaze entanyeni.
“Bobabili, umkakhe lendodakazi kabasekho emhlabeni,” kutsho uComm Nyathi.
Isehlakalo lesi sethuse izakhamizi zeKadoma.
Esinye isakhamizi seKadoma sibikele intatheli ukuthi:
“Kuyethusa lokhu, kungathi ngomunye nje umdlalo owesabekayo, isehlakalo ongeke usicabangele loba kanjani.
“Kuyamangalisa ukuthi kuyabe kutheni emuntwini ukuze enze isihluku esingaka abulale igazi lakhe, kunye lonkosikazi owamzalela lowomntwana.
“Abantu bonke bayamangala njalo bazibuza imibuzo ngoba akuzwisiseki ukuthi umuntu ukwenza njani lokhu.
“Loba ubelokungazwisisani lomkakhe, lokho kukhona emizini yonke, ubemele adinge enye indlela yokukhumisana umlotha lomkakhe, hatshi ukumbulala.
“Indodakazi yakhe yona ibingena ngaphi, ilempilo yayo, njalo ibizithwele isizabeletha, kube yikuphela kwakhe kanjalo nje. Lokhu kungathi nje liphupho elibi.”
