Online Reporter
Fungai Muderere
ILANGA lokucina lesizini yeCastle Lager Premiership lizadonsa amehlo kubalandeli bomdlalo nanko kulamaqembu ayisitshiya galombili akhangelane lokubalekela ukuqunywa lizembe.
Amaqembu la yiHighlanders, Chicken Inn, Manica, Dynamos, Triangle, Bikita, Greenfuel leYadah. Kudingwa ukuthi phakathi kwawo kuphume amathathu njengoba sekuhambe iKwekwe United.
Imidlalo yokucina kuPSL izakuba khona ngempelaviki ezayo. Kulimpelaviki akulamidlalo ngoba kudlala amaqembu amazwe.
Kunzima kubalandeli bamaqembu akoBulawayo iHighlanders leChicken Inn. Bakhangele ngabomvu iqiniso lokuthi ikhona engabuyela esikwakweni nxa zingekela ukuhlohla kakuhle ngelanga lokucina. Ukusila kwazo kuzakuya ngokuthi ezinye zidlale njani.
Zombili zizadibana ngelanga lokucina enkundleni yeBarbourfields.
Kumbali yePSL, akukaze kufike isibanga esinje kusadingwa ezaphuma ekupheleni kwesizini. Lo mqeqetshi weChicken Inn uJoey Antipas uyakuvuma ukuthi usengozini.
“Angikaze ngibhekane lesimo esinje lokhe ngaba ngumqeqetshi. Kunzima, kubuhlungu,” kutsho u-Antipas.
IHighlanders ikunombolo yetshumi kungalane yamaqembu, iChicken Inn ikweyetshumi lanye. Zonke zilemiklomelo engu-38.
“Kuzadabuka ibhulugwe ngelanga lokucina. Akuncengwana. Kuzabe kuyimpi emidlalweni le. Silethemba lokuthi sizanqoba,” ngu-Antipas lo.
Kusenjalo, iPSL isibike ukuba umdlalo we-final yeChibuku Super ophakathi kweDynamos leTriangle uzadlalwa mhlaka 29 Lwezi enkundleni yeGibbo.
ITriangle izabe isekhaya, ifisa ukuthi inqobe phambili kwabalandeli bayo, njengalokho eyakwenza ngesizini ka2018, itshaya iHarare City. Abafana abaqeqetshwa nguKelvin Kaindu, iDynamos bazafuna ukuthi batshengise ukuba zingqwele zomdlalo, bavale inhloni zokwehluleka kumkhankaso weligi. IDynamos yintshantshu ka2024.
