admin
SANGANO reZimbabwe Cricket rinoti rine hurongwa hwekuvamba ligi idzva iro richange richinzi Zimbabwe Premier Cricket League nechinangwa chekusimudzira mutambo uyu. Mukushi wemashoko weZC, Darlington Majonga, anoti ligi iri richange richiona zvikwata zvichitamba mutambo uyu svondo rega-rega senzira yekuuvandudza.Zvichitevera kudzikira kwange kuri kuita matambiro echikwata chemaChevrons icho chakaumburudzwa necheIndia mwedzi wadarika mumitambo yeOne Day International neTwenty20 series, Majonga anoti ZC ichashanda zvakasimba kuti itsvage nzira dzakasiyana dzekusimudzira mutambo uyu.
“Hatingambode kunyeperana, kutamba kwakaita vakomana hakuna kumbofadza, zvakavashurudzawo zvakare asi tiri kuzvigadzirisa.
“Tinenge takati dzokerei shure nekukundwa kwatakaita neIndia asi tiri kugadzirisa kuti tienderere mberi mumutambo uyu.
“Munguva iri kutevera, tichange tave neZimbabwe Cricket Premier League iyo tinofunga kuti ichatibatsira mukusimudzira mutambo uyu. Tine mimwe mitambo yakaita seLogan Cup uye kumapurovhinzi ose cricket iri kutambwa, izvo zvinorakidza kuti tiri kuedza nepatinogona kuti tisimudzire mutambo tiundese paunokodzera,” anodaro Majonga.
Kukundwa kwange kuchiita Zimbabwe mumitambo yadarika kwakaona chikwata ichi chichidzikira mumatambiro acho uye izvi zvinogona kuchitadzisa kuenda kumutambo weWorld Cup 2019 uyo uchatambirwa kuEngland neWales.
Zvikwata zvichabudirira kuenda kumutambo uyu ndeizvo zvinenge zviri muboka rinonzi Top 8.
Majonga anoti bhodhi idzva reZC rakaita chitsidzo chekuti Zimbabwe inofanirwa kuenda kunokwikwidza kumutambo uyu saka vari kushanda zvakasimba kugadzirisa zvose zvinodiwa kuti maChevrons aende kuEngland neWales 2019.
“Chinhu chatakazvipira kuti tiende kuWorld Cup nyore, tinofanirwa kupinda muTop 8. Kuti zviitike, tinofanirwa kuhwina mitambo yedu inotevera apo tichasangana nezvikwata zvakasiyana.
“Kuhwina kwedu tinenge tichiwana zvibodzwa zvinoita kuti tipinde muTop 8 saka tiri kutofanirwa kukwidziridza masokisi edu.
“Hatidi kuti tisvike pakutamba mimwe mitambo yekurwira kuenda kumutambo uyu,” anodaro Majonga.
Online Reporter