Online Reporter
Ethel Ncube
AKUBIZWA ozwayo eMzansi nanko phela iqembu leNsimbi zeZhwane liyabe lisethula idlalade eBaseline ngoMgqibelo.
Iqembu leli likhiphe inzwisa yengoma eyodwa ekudlalade leli ku-Youtube ngoMvulo lapho elithe abalandeli bazwe kancane ukuthi baphethe siphi isitayila.
Intatheli ixhumane lomaneja weqembu leli uBahlanu Sibanda obike ukuba konke kuhamba ngomumo.
“Amalungiselelo okukhipha idlalade lethu elibizwa Ifundamakhwela ahamba kuhle kakhulu. Abantu kumele bazilungiselele ukuzwa ukudla kwendlebe okuhlabusayo. Sikhiphe inzwisa sayifaka kuYoutube abafisayo bangayavula bazizwele isiqephu sengoma ethi Umthobanhliziyo. Yiyo esiyizwise uzulu.
“Ingoma ezikudlalade leli zingu-7 njalo zonke zikhuluma ngokuphathelane lempilo kumazinga atshiyeneyo. Zikhona ezikhuluma ngothando, ezikhuluma ngomdabu, isonto kunye lezehlakalo ezithinta impilo nje. Sizamile nje ukuphosa sigoqele konke okuphathelane lempilo,” kubika uBahlanu.
Uqhubekele phambili enxusa uzulu ikakhulu abaseMzansi.
“Sicela usekelo lwenu bantu bakithi lize ngobunengi lizophakamisa iqembu lenu leZhwane. Asibeni ndawonye simemane sonke sigcwalise indawo abazabe betshayela kiyo abafana. “Iqembu ngelenu lengoma ngezenu. Uthando lwenu lusenza sikhule emculweni sihlale silangazelela ukulenzela okuhle kodwa ngoba lisithanda lathi silithanda.
“Asidibaneni ngoMgqibelo khona eMzansi siyekuzwa okuphekwe ziNsimbi asikholiseni ndawonye bakwethu,” kuphetha uBahlanu.
