admin
Malven Mugadzikwa
ZIMBABWE Human Rights Commission (ZHRC) yakabatana nebazi redzidzo yepuraimari nesekondari mukutanga chirongwa chekwizi icho chine donzvo rekudzidzisa nezvekodzero dzevanhu muzvikoro.
Chirongwa ichi chakaparurwa nemusi weMugovera wadarika pachikoro cheGirls High School, muHarare, apo vana vemuzvikoro zvemuHarare vakatangisa makwikwi aya.
Vachitaura pachitiko ichi, munyori mukuru mubazi redzidzo yepuraimari nesekondari, Mai Tumisang Thabela – mumashoko avakaverengerwa naDr Patrick Ngandini vanova education research officer kubazi iri – vanoti mubatanidzwa webazi ravo neZHRC idanho guru pakupa ruzivo kune veruzhinji maringe nekodzero dzevanhu.
“Ndinofara chaizvo kuva pachiitiko chino chiri kutsigirwa nebazi redzidzo yepuraimari nesekondari rakabatana neZimbabwe Human Rights Commission. Hurumende yakagadzira bumbiro remutemo rinokoshesa kodzero dzevanhu, rinopa rukudzo kuvanhu uye rinoenzanisa mikana pakati pevanhukadzi nevanhurume.
“Sebazi, tine basa rekukurudzira kuchengetedzwa kwekodzero dzevanhu nekupa ruzivo maererano nekodzero muzvikoro,” vanodaro.
Vachitaura vakamirira sachigaro weZHRC, Commissioner Elasto Mugwadi, Commissioner Petunia Chiriseri vanoti kubatana kwakaita komisheni yavo nebazi redzidzo yepuraimari nesekondari idanho rekutanga pakudzidziswa nekuchengetedzwa kwekodzero dzeveruzhinji.
Online Reporter