Online Reporter
Nkosilathi Sibanda loLangalakhe Mabena
INHLANGANISO yeMthwakazi kaMzilikazi Cultural Association (MMCA), eqoqa umgubho wokukhumbula iNkosi uMzilikazi minyaka yonke, ibike ukuba konke sekumi ngendlela eqondileyo ukuthi kuqhutshwe lumkhosi eMhlahlandela, eMatobo.
NgoLwesihlanu inhlanganiso le izamukela inkulungwane zabantwana besikolo kulindawo, njengengxenye yohle-lo oluhlose ukuthuthukisa abasakhulayo lokulondoloza amasiko lamagugu esizwe.
Uhlelo lwabafundi lolu luzabe lungoLwesihlanu mhlaka 4 Mpandula. Umgubho weNkosi uMzilikazi ungoMgqi-belo mhlaka 5 Mpandula.
Kubikwa abantwana bazafundiswa ngembali yeNkosi uMzilikazi kanye lesizwe samaNdebele, kuphinde ku-gcizelelwe ukuqhutshwa kwenhlalakahle yabantwana.
Kukhangelelwe njalo ukuthi kube labafundi abanengi abavela ezikolo zeMatabeleland North, Matabeleland South lakoBulawayo.
Isiphathamandla esibona ngezokwethulwa kwemibiko kuMMCA, uMnumzana Bigboy George Sibanda, uthe uhlelo
lwabantwana lwaqalwa ngomnyaka odluleyo ngemva kokuba inhlanganiso ibone indingeko yokufundisa abasakhulayo ngembali yabo.
“Ngomnyaka odluleyo saqala uhlelo lwezikolo ngosuku olwandulela umkhosi omkhulu ukuze sifundise abant-wana ngembali yeNkosi uMzilikazi kanye lesizwe samaNdebele.”
Uthe impumelelo yaloluhlelo yenza abaqoqi bomkhosi banquma ukulwenza lube yingxenye yemikhosi yokukhumbula iNkosi uMzilikazi minyaka yonke.
Uthe abantwana bazafundiswa njalo ngamasiko atshiyeneyo akha isizwe samaNdebele, okugoqela amaVenda, amaSotho, amaKalanga lamaNambya.
“Abantwana bazafunda ngamasiko ehlukeneyo enza isizwe samaNdebele. Bazaphinda bafundiswe ngokwazi impahla zamasiko lokupheka ukudla kwesiNtu,” kutsho uMnu Sibanda.
Elinye ilunga lekomithi le uNkosikazi Crescentia Ngwenya, uthe uhlelo luzaphinda lukhangele indaba ezithinta amantombazana.
“Sifuna ukususa abantwana emigwaqweni, ikakhulu amantombazana.”
Uthe uhlelo luhlose ukufundisa amantombazana ukuzihlonipha, ukuziphatha ngendlela efaneleyo lokulondoloza ubuntombi bawo.
“Abantwana bazafundiswa ngokuziphatha, ukugqoka ngendlela ehloniphekayo lokwazi ukuqakatheka koku-londoloza ubuntombi kuze kube yisikhathi sokutshada,” kutsho uNkkz Ngwenya.
Kusenjalo, kulindelwe iqula labaculi labalingisi beSouth Africa elizafika koBulawayo ngoLwesine.
Phakathi kwabalindelweyo ngumculi kamaskandi uKhuzani Mpungose, umlingisi uDawn Thandeka King loMpilo Mthatha, abadlala kuhlelo lweMzansi Magic oluthi Shaka iLembe.
Kukhangelelwe njalo izivakatshi ezivela kwamanye amazwe e-Africa.
Umkhosi omkhulu uzakhokhelwa ngohambo lwamasiko oluzaqalisa eMatshobana ngehola lesitshiya galombili ekuseni, lukhokhelwa ngamatshitshi, amaguqa, abafana, amajaha lamaButho.
UMnu Bhebhe ukhuthaze wonke umuntu ozangena emkhosini ukuthi agqoke impahla yesiNtu emele amasiko akhe, esithi isizwe samaNdebele sakhiwa yizizwe ezitshiyeneyo njalo ukuhlukana kwazo kumele kutshengiswe ngokukhulukeka, kukhunjulwa impilo lelifa leNkosi uMzilikazi.
