adminYiNtatheli kaMthunywa
INHLANGANISO yeBasketball Union of Zimbabwe (BUZ) ibika ukuba ayisuthiseki ngokudlala okwenziwe liqembu lakuleli kumncintiswano osanda kwedlula owamazwe eAfrica owe-Afro-Basketball eTunisia.
Kubikwa ithimu yeZimbabwe yehluleke lokunqoba ngitsho loyedwa umdlalo.Loba inhlanganiso yeBUZ ihlaba umkhosi ngokwehluleka kweqembu, kusobala ukuthi isizatho salokhu kwaba ngamalungiselelo eqembu anduba liyencintisa.
Umongameli weBUZ uAddison Chiware utshele iphephandaba likazulu ukuba babuhlungu ekuthini behluleke ukunqoba kodwa uphange wachaza ukuthi abasoli kakhulu ngoba balibonile iphutha labo.
“Iqembu lidlale lancintisa kodwa laswela ukuphenduka ekhaya liphethe imendulo. Kuzwisa ubuhlungu kodwa esikuthabelayo yikuthi senelise ukuyancintisa ngesikhathi kucatshangelwa ukuthi sizehluleka ukwenza lokhu. Ngokuncintisa kwethu ku-Afro-Basketball, isizwe sithole okunengi okuzaphathisa ukuthi sikhulise umdlalo wethu,” kutsho uChiware kuliviki.
Uthe inhlanganiso yabo ibonga kakhulu ikomithi eyaqoqwa ngesikhathi esifitshane iphiwe umlandu wokuqoqa amankampani lengatsha ezingancedisa ithimu.
“Okwancedayo yikukhulumisana labantu abangenelisa ukuphathisa ngemali ikakhulu amankampani. Lakanye sahlanganisa konke lokhu isikhathi sisesekhona.”
UChiware lezinye iziphathamandla zeBUZ zaswela ubuthongo kumaviki adluleyo ngokudinga labo abangancedisana labo ukuze ithimu yesizwe iyencintisa.
Iqembu leZimbabwe lalifuna imali efika $200 000 ukuze lilungiselele iphelele.
UChiware uthe bafunde ukuthi nxa sebelungiselela imincintiswano elandelayo, ihlanganiso yabo kumele iqoqe ukuthi nxa imali isikhona, ithimu yesizwe iyelungiselela imidlalo yayo ingaphandle kwesizwe ukuze ijwayele umkhathi.
“Sifisa ukuthi iqembu leZimbabwe liyelolonga ngaphandle kwelizwe kuseselesikhathi,” nguChiware lo.
Online Reporter