adminYiNtatheli kaMthunywa
UHLELO lokufundisa abaqeqetshi lababalisi kumdlalo we-taekwondo uyaqhubeka, nanko kubikwa usungena lasesabelweni seMatabeleland.Umdlalo we-taekwondo awuladumo kangako emizini yabantu abansundu, kukanti abanye abawukhwabithi lumdlalo. Okwamanje umdlalo lo usabalale ezikolo zemasebhabha, ikakhulu emadolobheni akoBulawayo laseHarare.
Inkokheli zalumdlalo esabelweni esingezansi yelizwe sezibike ukuba zilusizi ngokuthi abantwana besikolo bayavilapha ukuphatheka kulumdlalo.
Imizamo yokunxusa abasakhulayo ukuthi bafundiswe ngomdlalo iyehlula.
“Isikhalazo sethu siyakubazali ngoba yibo okumele batshutshise abantwana ukuthi bathakazelele umdlalo,” kubika uRicky Tembo umqeqetshi we-taekwondo.
UTembo uthe umlandu ukubazali ngakho sebephezulu kokuqoqa umbuthano lapho abazafundisa abazali ngomdlalo.
I-taekwondo ithakazelelwa ngabadala njalo lokhu sekubonakele kumincintiswano yamazwe. IZimbabwe imelwa ngabadlali asebekhulile.
“Ungakhangelisisa, isizwe sidlalelwa ngasebekhulile bodwa. Abadlali abasacathula bambalwa ku-taekwondo. Kungumbono wethu ukuthi simemethekise umdlalo ebantwaneni.”
UTembo ophinda abengumgcinisihlalo womdlalo we-taekwondo eMatabeleland uthumele iphephandaba likazulu umbiko wathi njengokuphawulwa kwekhalenda yabo ka2015, sebezaqala ukungenangena emalokitshini befundisa intsha ngalumdlalo.
“Siyaqhubeka ngokwandisa ulwazi kubadlali abatsha, ikakhulu ulutsha lweMatabeleland. Abahloli bethu bazaqala ukwenza umsebenzi lo emalokitshini kanye lasezikolo ezimbalwa esizikhethileyo.”
UTembo wengeze wathi: “Kusukela khathesi asisavumeli abadlali abaphonguvumbuluka balwele ukugqoka amabhanti bengaqinanga. Kwakusenzakala kudala lokhu.”
Amabhanti atholakala kulumdlalo abalisa amhlophe, alithanga, aluhlaza, abomvu kanye lamnyama ayiwo asetshenziswa ngabadlalela ilizwe lakumincintiswano elesisindo.
Online Reporter