admin
Cornelius Luphahla
INHLANGANISO ekhangela ngokugcinwa kuhle kwemvelo eye-Environmental Management Agency (EMA) isisungule amacebo amatsha okulondolozwa kwemvelo nanko phela isikhuthaze abafundi ezikolo ukuba babumbe amaqembu okuncintisana kumpikiswano ngokuqakatheka kwemvelo.
Lokhu kuvezwe nguMgcinisihlalo we-EMA esabelweni seMatabeleland North, uNkosikazi Chipo Zuze-Mpofu ngoLwesine kuviki ephelileyo esikolo seFatima High School lapho obekuncintisana khona izikolo ngokuqakatheka kwamaxhaphozi.
Kulo umncintiswano abafundi abenze kuhle baphiwe imivuzo etshiyeneyo kanye lezikolo zabo ukuze babe lentshukuntshu yokuqhubekela phambili bechwayisisa ngokuqakatheka kwemvelo.
Izikolo ebezikulo umncintiswano bezigoqela iFatima High School, Tsholotsho High School, iHwange High School, iMosi yatunya High School, Mabhikwa High School, Inyathi High School, Nkayi High School kanye le Dinyane lapho isikolo seFatima High School esithole umvuzo wokwenza kuhle silandelwa yiTsholotsho High School.
UNkkz Zuze-Mpofu uchaze ukuthi bakhethe ukuba abafundi benze umncintiswano lo ukuze benelise ukulondoloza imvelo.
“Sikhethe ukuba abafundi bancintisane ngokuqakatheka kwemvelo ukuze bakhule besazi ukuqakatheka kwayo lokuphathwa kwayo njengoba kuyibo abakhokheli bakusasa.
“Ekuphikisaneni lokhu ingqondo zabo ziyalolana okubangela ukuthi babe lolwazi olunengi ngezemvelo,” kulandisa uNkkz Zuze-Mpofu.
UNkkz Zuze-Mpofu ungezelele wathi okunye okubenza baphe abasakhulayo ulwazi ngemvelo yikuthi sebenanzelele ukuthi abafundi labo bayaphatheka ekubhidlizeni imvelo.
Inhlanganiso le ichaze ukuthi imvelo iyavikela ukugugudeka komhlabathi njalo ukuze abantu baphile kuhle kubalulekile ukuthi kube lemvelo, ngoba iyimpilo.
Online Reporter