Online Reporter
Nkosilathi Sibanda
ABAQOQI beRhumba News ZW babika ukuba umkhosi wokubonga abaculi be-rhumba usuzaqhutshwa mhlaka 13 Mpandula.
Bekuhlelwe ukuthi uqhutshwe mhlaka 26 Ntulikazi, kodwa ngenxa yokwengezwa kwamahlandla ezicoco, kufakwa amanye angaphansi kwe-Africa Hlangana, abaqoqi bomkhosi lo bakubone kufanele ukuthi udluliselwe phambili wenziwe ngoMpandula.
“Bathandekayo, siyathemba beselibona ukuthula kwethu maqondana lama-awards. Isikhathi besingeke senele kahle ukuthi abantu bavote, ikakhulu ngemva kokufaka amanye amahlandla angaphansi kwe-Africa Hlangana.
“Ngakho sibone kukuhle ukuthi sidlulisele phambili ama-awards ku 13 Mpandula 2025. Lokhu kuzanikeza abantu isikhathi esaneleyo ukuthi bakhankase. Siyabonga uthando lwenu olungaka,” kutsho abe-Rhumba News ZW, kumbiko wabo ngempelaviki edluleyo.
Kubikwa ukuvota kuzavulwa mhlaka 13 Ntulikazi kusiyavalwa mhlaka 31 Ncwabakazi.
Amahlandla amatsha, angaphansi kwe-Africa Hlangana ayisitshiya galombili, agoqela iBest Male Gospel Artist, Best Female Gospel Artist, Best Male Hip Hop/ Afro Pop, Best Female Hip Hop/ Afro Pop Artist, Best Male Maskandi Artist, Best Female Maskandi Artist, Best AmaPiano Artist leBest Disco Artist.
Umbuzo okhona phakathi kwabalandeli bomculo lo yikuthi ngubani ozabusa kwezomculo we-rhumba lonyaka?
Izicoco lezi kukhangelelwe ukuthi ziphakamise abaculi abasacathula, lalabo abangakatholi udumo, inhloso ingeyokuba khuthaza lokubabonga emsebenzini wabo wokujabulisa uzulu.
AbeRhumba News ZW babike ukuba lonyaka abaculi labathandi bomculo kumele bakhangelele okukhulu.
Babike njalo ukuthi kuzabongwa labantu kanye lamaqembu aphathisa umphakathi kumisebenzi etshiyeneyo.
Ngo-2024 kwanqoba uMr Bones ngengoma yakhe ethi, Bangihlangabeze nge-case, eyathola amavoti angu-50 956. Kwalandela iNsimbi zeZhwane ngengoma yabo, Ingqinamba, eyaba lamavoti angu-50 255.
