Online Reporter
Ethel Ncube
ABALIMI abalendawo sebekhuthazwe ukuthi bangene ekufuyeni inhlanzi ngoba zilemali njalo abafuyi bazo balutshwana.
UNkosazana Silindiwe Shumba osebenza kunhlanganiso yabalimi ye-Agricultural Extension Services uthe abantu abafuya inhlanzi esabelweni seMatabeleland balutshwana kakhulu.
Ekhuluma lentatheli uNkszn Shumba ubike ukuba inhlanzi ezidliwa koBulawayo zivela endaweni ezikhatshana ngoba abalimi balapha bayathandabuza ukungena kubhizimusi le.
“Balimi asizameni ukufuya inhlanzi ngoba ziyafunakala kakhulu emkambo.
“KoBulawayo khonapha sathi sibhoda sisenza inhlolisiso sathola ukuba inhlanzi ezinengi zivela eKariba, akulabantu abazifuyayo koBulawayo.
“I-kg yenhlanzi ibiza $4 kusiya phezulu koBulawayo. Nxa ungafuya ungumlimi yikulungisa indawo yakho yokufuyela lamanzi lokuthenga inhlanzi zokuhlanyela suqedile,” kubika uNkszn Shumba.
Uqhubekele phambili echaza ukuba abantu bengesabeli khatshana ukufuya inhlanzi.
“Ngiyakwazi ukuthi abalimi abanengi bangakhala ngokuthi abalalwazi lokuzifuya kodwa kuhle lisondele kubalimisi abaseduzane lani bayelabela ulwazi ngokufuya inhlanzi ukuze liphumelele kubhizimusi le.
“Lingahlanganyela libe lihlekana esigabeni, umlimisi alidingele umuntu alincedise liqale ukufuya lizitholele imali yenu kanye lesitshebo,” kuphetha uNkszn Shumba.
