Online Reporter
Nkosilathi Sibanda
UMBUKISO wezemfundo oweScholastica Expo uqale ngoLwesithathu eZimbabwe International Conference and Exhibition Smart City (ZICES) njalo ukhangelelwe ukugqotshwa mhlaka 1 Ncwabakazi.
Obona ngezokuthengiselana lokuxhumana kunkampani yeZimbabwe International Trade Fair, uMnumzana Thandolwenkosi Nkomo, uthe konke kuhambe kuhle kumalungiselelo ombukiso lo.
IScholastica ngumbukiso ohlanganisa abantwana bezikolo, amakolitshi lamankampani kuhloswe ukwakha ubudlelwano kungatsha lezi.
Uzavulwa ngokusemthethweni nguMphathintambo weHigher and Tertiary Education, Innovation, Science and Technology Development uAmbassodor Frederick Shava ngoLwesine.
Indikimba yalonyaka ngethi: “Empowering Future Generations through Heritage Based Education and Innovation.”
Kubikwa lonyaka umbukiso lo uzazimela wodwa ukwenzela ukuthi labo abazaphatheka kuwo bathole isikhathi eside sokuxhumana, ukwabelana ulwazi kwezemfundo.
Kuminyaka edluleyo iScholastica Expo ibiqhutshwa sikhathi sinye lombukiso weTrade Fair.
“Sinxusa abafundi, ababalisi, izisebenzi, amankampani lezinye ingatsha ukuthi ziphatheke kulumbukiso.
“Inhloso yethu yikuthi sivale isikhala esikhona phakathi kwamankampani lengatsha zemfundo kuleli, ukuze kulolongwe abantu abazi imisebenzi yabo ngokufaneleyo,” kutsho uMnu Nkomo.
Uthe bafuna ukuthi abafundi labo bonke abazaphatheka bathole usizo lwaphezulu kuScholastica Expo.
UMnu Nkomo uchaze ukuba ukuqhutshwa kwalumbukiso ngesikhathi seTrade Fair kwakunganikezi abantu ithuba elaneleyo.
“Ngenxa yokusilela kwendawo, kwesinye isikhathi iScholastica ibiqhutshwa eZimbabwe Academy of Music, kodwa khathesi sinikeze abazaphatheka indawo enkulu.”
Amankampani kumele athumele izisebenzi zawo ezikungatsha zeHuman Resources lamanye amamaneja azekwabela abafundi ulwazi, baxoxe ngempilo yabo emsebenzini.
UMnu Nkomo uthe bafuna ukuthi iScholastica Expo itshengise ukuqakatheka kwe-Education 5.0 kubafundi.
