Online Reporter
KULOMLAYO okuncwadi engcwele ongomunye wemithetho elitshumi othi ungatshontshi. Kukanti labadala bayatsho ukuthi akuqili lazikhotha emhlane.
Emhlubulweni wakithi emaNdebeleni izakhamizi zemaphandleni sezithwele qatha ngokuntshontshelwa izifuyo. Amasela akhona kawakhethi, athatha zonke nje izifuyo ezigoqela inkomo, imbuzi labobabhemi.
Isimanga yikuba amasela akhona ayaziwa kodwa kawabotshwa. Ufica ezigqaja ngokuthi angaze abotshwe kodwa ngenxa yokuba balabameli abaqinileyo bayabakhulumela bakhitshiswe imali yesibambiso ebizwa ngolimi lwabondlebe zikhanyilanga i-bail.
Okubuhlungu ngamasela la, yikuba bathi lapho bethonisiswa besuka ngekhaya babuye batshontshe futhi. Abanye sebeze beseqela lelizweni esakhelene lalo iBotswana besiyazitshontsha khonale babuye lazo. AmaTswana kodwa asehlakaniphile nanko lezinsuku bayazilandela abazithola ziphila bayabuyela lazo.
Abafuyi abanengi sebadinwa ngokutshitsha enkantolo lawomasela engagwetshwa ngoba belezimali zamagqwetha, abanengi abasazikhathazi, sebeqonda kubosiyazi.
Sekukhona izinyanga ezilumisa ngenyosi ufice umuntu sebuthanelwe zinyosi zimluma aze ayehlawula kumnikazi ngenani eliphindwe kathathu. Ngikhumbula omunye ugogo wafungela elinye isela elitshela ukuthi khona kuzake kubonakale ukuthi okulamandla ngamadlozi akhe kumbe ngamagqwetha.
Akuphelanga nsuku ngaki waqala ukukhukhumala isisu ebovula okwensengwakazi ecine ukumunyisa ngayizolo.
Amanye amasela ufica ebhodabhoda ezitolo etshaya imvokloklo ethi uqhuba inkomo ziya edibheni ayabule umuntu weNkosi ebhoda ndawonye.
Ngithemba lokhu kuba yisibonelo kwamanye amasela ukuthi atshiye umkhuba wokutshontsha.
Likhona elinye isela elithe livela qhuba umhlambi, lithe liqeda ukuzivalela eseqonde ngekhaya zafohla inkomo zamgijimisa zimgwaza ngempondo eziyingudula zimgqubula ngamakhanda waze wayawela egumeni lomnikazi wazo. Kulapho engikholwe ukuthi umuthi uyasebenza njalo abantu bayaloya.
Ayixabene.
