Online Reporter
Abel Ndooka
AIMBOVE kaputeni wechikwata chenyika checricket — Brendan Taylor — akasarudzwa kupinda muchikwata chemaChevrons, icho chichatatsurana neSri Lanka mumitambo miviri yeone-day international (ODI).
MaChevrons neSri Lanka zvichatanga kubandana musi weChishanu chino kuHarare Sports Club uye mutambo wechipiri uchazoveko musi weSvondo.
Apa tichaona Taylor achitamba mitambo yeODI kekutanga kubva mugore ra2021, zvichitevera kudzoka kwaakaita muchikwata chemaChevrons mushure mokunge ambotemerwa zvirango zvekusatamba apo akabatwa nemhosva dzakasiyana-siyana. Mwedzi uno, Taylor akashevedzwa, akapinda muchikwata chemaChevrons chemitambo yetest match, icho chakatamba neNew Zealand kuQueens Sports Club, kuBulawayo.
Achitaura pamusoro pekudzoka kwaTaylor, convener of selectors kuZimbabwe Cricket (ZC), David Mutendera, anoti sechikwata, vakamugamuchira nemaoko maviri uye kudzoka kwake kuchaunza unyanzvi mumatambiro avo.
“Tine mufaro nekudzoka kwaBrendan muchikwata chedu.
“Ruzivo rwake uye unyanzvi hwake hwakatikoshera, kunyanya panguva iyo mutambo unenge wakaoma, saka tinofara kuti kudzoka kwake kuchasimudzira chikwata chedu,” anodaro.
Zvakadaro, ZC yakaumba chikwata chevatambi 16 avo vachasangana nemaLions eSri Lanka mumitambo miviri iyi yeODI.
Mitambo yeODI ichipera, maChevrons nemaLions achatamba mitambo yeTwenty20 International Series mazuva anoti 3, 6 na7 Gunyana.
Chikwata cheODI chemaChevrons
Craig Ervine (kaputeni), Brian Bennett, Johnathan Campbell, Ben Curran, Brad Evans, Trevor Gwandu, Wessly Madhevere, Clive Madande, Ernest Masuku, Tony Munyonga, Blessing Muzarabani, Richard Ngarava, Newman Nyamhuri, Sikandar Raza, Brendan Taylor, Sean Williams
