Online Reporter
Abel Ndooka
CHIKWATA chenyika checricket chemaChevrons chiri mushishi kuita gadziriro, apo chakatarisana nekuzosangana neSri Lanka mumitambo mishanu inoti miviri yeOne-Day International (ODI) nemitatu yeTwenty20 International Series.Mitambo yezvikwata zviviri izvi ichatanga nemusi wa29 Nyamavhuvhu uye yose ichatambirwa kuHarare Sports Club, muHarare.
Zvikwata zviviri izvi zvichatanga kubandana mumitambo yeODI, iyo ichatambwa mumazuva anoti 29 na31 Nyamuvhuvhu; yeT20 ichizotambwa musi wa3, 6 na7 Gunyana.
Kuuya kuchaita chikwata cheSri Lanka kachange kari kekutanga kubva mugore ra2020 apo maLions aya akapedzisira kuuya muZimbabwe kuzotamba nemaChevrons.
Mugore ra2020, maChevrons nemaLions eSri Lanka zvakasangana kuHarare Sports Club, ndokutamba mitambo miviri yeTest match, iyo yose yakazohwinhiwa neSri Lanka.
Zimbabwe iri kupinda mumutambo uyu ichangobva kusangana neNew Zealand, iyo yayange ichibandana nayo mumitambo miviri yeTest match series yakatambirwa kuQueens Sports Club, kuBulawayo.
Mitambo yose iyi yakazohwinhiwa neNew Zealand.
Munguva pfupi iri kutevera, murairidzi wemaChevrons anotarisirwa kudoma chikwata chake, icho chichasangana nemaLions eSri Lanka.
