Online Reporter
Zimpapers Sports Hub
AMAQEMBU kanobhutshuzwayo abizwa ngokuthi yiwo amakhulu kuleli, iHighlanders, CAPS United leDynamos aphume engaphathanga lutho ngempelaviki edluleyo.
Kuyavela ukuthi kulezinsuku amaqembu la akhulelwa yilawo asanda kungena kumbango weligi. IHighlanders inqotshwe okwakuqala eBarbourfields kulisizini, itshaywa nge 1-0 yiHerentals ngempelaviki edluleyo.
Ngelanga elifanayo, iCAPS United inqotshwe 3-0 yiSimba Bhora. Kudanisile njalo iDynamos ikhulelwa yiNgezi Platinum nge 2-1. Zonke zontathu zehlile kungalane yamaqembu akuligi yeCastle Lager. IHighlanders ikunombolo yesitshiya galolunye ilemiklomelo engu-18, kumidlalo engu-13.
ICAPS United ikunombolo yesi-15, iphethe imiklomelo engu-10. Ilandelwa yiDynamos layo esendaweni ezwisa ubuhlungu kunombolo yesi-16, ilemiklomelo eyisitshiya galolunye.
Kulandela ukunqotshwa yiHerentals, umqeqetshi weqembu leHighlanders uKelvin Kaindu uthe ubekukhangelele ngoba umdlalo lo ubumsinda njalo ukunanzelele ngesikhathi elolonga abadlali.
“Bekungelula. Silahleke ngesikhathi silolongela umdlalo. Kukhona ebesingelakho. Njengomqeqetshi uyazibonela ukuthi iqembu lakho kalilungiselelanga okwaneleyo,” kutsho uKaindu.
Umqeqetshi weCAPS United u-Ian Bakala uthe: “Imvimbi zethu kumele zisebenze nzima. Akumelanga sidlale amadlwane la. Siyadlala kuhle komunye umdlalo, kolandelayo sinqotshwe.”
Impumela yemidlalo kuligi yeCastle Lager:
NgoMgqibelo: Kwekwe United 0-1TelOne, GreenFuel 1-1 MOWOS, Ngezi Platinum Stars 2-1 Dynamos, Bikita Minerals 0-0 ZPC Kariba, Yadah Stars 0-0 FC Platinum
NgeSonto: Triangle United 0-1 Manica Diamonds, CAPS United 0-3 Simba Bhora, Highlanders 0-1 Herentals College
