Online Reporter
Fungai Muderere
NGENDLELA amaqembu alemali alwisana ngayo ukuthola isayinetsha kaKelvin Kaindu, kuveza ukuthi umqeqetshi lo uzabe khona kuleli ngesizini ezayo.
Usezakhele udumo ngokuvikela ukuthi iqembu leDynamos lingaqunywa lizembe kuCastle Lager Premier Soccer League lokuqeda isizini iyintshantshu yenkezo yeChibuku Super.
Esuka kuHighlanders ngoNtulikazi, uKaindu ufike kumaGlamour Boys waguqula izinto, okuyikhona okumenze waba semlonyeni wezikhulu zamaqembu akuPSL lamanye asanda kungena. Inengi lamathimu la lilemali ezwayo.
Ikontikela yakhe leDynamos icina mhlaka 31 Mpalakazi. Akukacaci ukuthi bazakwengeza isivumelwano kodwa ezinye zibheke ngelibomvu ukumdonsela eduzane.
Phakathi kwamaqembu la kuleHardRock leSimba Bhora.
UKaindu uthe kakezwa lutho kodwa uyazi ukuthi lesi yisikhathi sokucubungula ingqondo njengoba abaqeqetshi abanengi sebetshintsha amaqembu.
“Ngibona angathi kuzakuba yisikhathi esinzima kubaqeqetshi. Bakhona abaqeqetshi asebesuke baya kwamanye amaqembu, okutsho ukuthi imisebenzi izavuleka. Asekhona amahemuhemu, sizabona ukuthi kuzaphetha njani,” nguKaindu lo ekhuluma leZimpapers Sports Hub.
Umqeqetshi uthethe isikhathi sokubuyela muva, ehlaziya umsebenzi awenzileyo lonyaka.
“Kunengi engingakhuluma ngakho. Angizange ngicabange ngizibona ngisuka kuHighlanders ngisiya kuDynamos. Akuzange kufike engqondweni yami lokhe ngaqeqetsha eZimbabwe.
“Kodwa, ngicabanga ukuthi uNkulunkulu wangibeka lapho ngenhloso enkulu, njalo sengikubonile lokhu.
Ngathi ngisiya kuDynamos, ngasolwa ngabanengi. Kwaku lubizo olwavela kuNkulunkulu,” nguKaindu lo.
Uqhubeke wathi: “Singakhangela imiklomelo engayithola kuHighlanders, laleyo esayithola kuDynamos, kwakuza kubayisizini enzima. Ukuphumelela kweDynamos kwaba lukholo lwethu kuNkulunkulu.”
UKaindu uqede isizini engadliwanga kumidlalo yakhe ekuDynamos.
