admin
Cornelius Luphahla
ABALIMI besigabeni seMafa, eLupane baphakathi kwetshe lembokodo nanko phela inkomo zabo sezihlaselwe ngumkhuhlane we-foot rot osokudale ukuba ziphelelwe ngamasu okuwenqabela.
Umkhuhlane lo kubikwa okwakhathesi usuhlasele imihlambi emibili kodwa uhlasele inkomo ezinengi.
Umkhuhlane lo kubikwa uhlasela amasondo enkomo avuvuke ingenelisi ukuhamba.
UMthunywa uxhumane lesinye isakhamuzi esilezifuyo esezihlaselwe yilo umkhuhlane uMnumzana Sininisenkosi Ncube ochaze ukuthi umkhuhlane lo umemetheka masinyane kakhulu.
“Umkhuhlane lo ukhanya umemetheka ngamandla ngoba mina ngiqale ukuwunanzelela ngoLwesithathu kuviki yonale ephelileyo usahlasele inkomo ezine kuphela kodwa kuthe kusiyakuba ngoLwesine ubusuhlasele ezingu-10,” kutsho uMnu Ncube.
Uqhubekele phambili njalo waveza ukuthi uke wabikela abe-veterinary kodwa abazange bamsiza ngalutho.
“Ngike ngabikela abe-veterinary ngikhangelele ukuthi bazanginceda kodwa abazange bangisiza ngalutho ngakho khathesi lokhu ngidinga amacebo engingawenza ukuze ngenelise ukuvikela inkomo zami kulo umkhuhlane,” kuveza uMnu Ncube.
UMnumzana Samson Moyo esinye isakhamuzi sakule indawo esilenkomo ezihlaselwe yilo umkhuhlane uchaze ukuthi laye lokhu ezama amacebo okwelapha inkomo zakhe.
“Mina ngikhuluma nje inkomo zami seziyisithupha ezihlaselwe yilo umkhuhlane ngakho sengizamile ukuzihlaba amajekiseni kodwa kukhanya lokhu zingasili, angazi kumbe ngisebenzisa umuthi ongayisiwo,” kutsho uMnu Moyo.
UDokotela wezinyamazana uNdabezinhle Mkhwananzi uchaze ukuthi ukuqhamuka komkhuhlane lo bebengakakuzwa.
“Indaba yomkhuhlane we-foot rot osuhlasele inkomo zeLupane besingakayizwa ngakho sizathatha amanyathelo okuvikela umkhuhlane lo oyingozi ezifuyweni,” kutsho uDkt Mkhwananzi.
Online Reporter