Online Reporter
Lovemore Dube
INYATHELO lokwengeza inani lamaqembu kuPremier League kuleli liveza bhadla ukuthi umdlalo usasemuva kuleli.
Abaphathi bomdlalo bafuna kube lamaqembu angu-20, esuka ku-18 njalo kabafuni ukuthi kube leqembu elizakhitshwa lonyaka, okutsho ukuba ngesizini elandelayo kuzadlala amathimu angu-22.
Inyathelo lelo libekwe yinhlanganiso yeZifa ekhokhelwa nguNqobile Magwizi. NgoLwesibili amaqembu ePSL ahlangane eHarare avumelana kulokhu.
Kuthe sekuvunyelwene, lingakatshoni ilanga abeZifa babike ukuthi akulanto enjalo ezakwenzakala.
Abalandela umdlalo kanobhutshuzwayo babeke imibono ehlukeneyo, kulabanye abathe nxa sekulamaqembu amanengi kuPSL, kuza kuba lomncintiswano omkhulu.
Abanye bathe izinga lomdlalo lehlile, ngakho lingehla kakhulu nxa sokulamaqembu amanengi adlalayo. Khathesi abanengi bathi umdlalo awusekho mnandi ngoba amaqembu amanengi anabile njalo kulabadlali abangalaziyo ibhola.
Lithe litshona elangoLwesibili iZifa ibisibhale incwadi ibika ukuthi akusoke kubenjalo. Ithe kukhona okumele kwenziwe kuqala.
“Inhlanganiso yeZifa ithanda ukwazisa abemuli kanobhutshuzwayo mayelana lokungasuswa kwamaqembu kumnyaka ozayo.
“IZifa yazisa ukuthi lokho akuvumi lanxa amaqembu ePSL evumelane kulokho. Injongo yikuthi kudlalwe kube labanqobi labadliwayo, lokho kuyabe sekusenza umdlalo ungahloniphi injongo yawo,” kutsho iZifa kuncwadi ephume ngoLwesibili ntambama.
Ukwenza kweZifa kutshiye abanengi bezibuza ukuthi kanti njengoba yona iyiyo eyakuqalayo kungani isizikhupha kukho.
Lokhu kwenza abantu bangibi lethemba kumdlalo wakuleli.
Imidlalo ekhangelelweyo kumpelaviki igoqela oweFC Platinum leDynamos enkundleni yeRufaro ngeSonto kuthi koBulawayo kuzadlala iChicken Inn leHighlanders eBarbourfields. I-FC Platinum yona ayilankinga kodwa iDynamos iphefumula ngenxeba ngoba ingehla iyekuNorthern Region.
KoBulawayo kusasenzima ngoba zombili zisengozini.
