Online Reporter
I-AFRICA Cup of Nations (Afcon) eqhubekayo eMorocco, iqale ngegiya eliphezulu njengoba inengi lemidlalo belilamagoli ancomekayo, kodwa ziyanda lezikhalazo ngezinqumo zabonompempe ngokusebenza kohlelo lwe-Video Assistant Referee (VAR) kulo mqhudelwano oqale mhlaka 21 Mpalakazi.
Abaqeqetshi labadlali bamazwe ehlukeneyo sebeqalile ukusola onompembe kanye le-VAR abakholwa ukuthi baxova impumela ngokuthatha izinqumo ezivuma amaqembu athile.
Ngesikhathi iqembu leBafana Bafana, linqotshwa yi-Egypt ngo 1-0 ngoLwesihlanu emdlalweni walo wesibili kaGroup B, umqeqetshi uHugo Broos, ukhale ngombekwa onikwe i-Egypt, evalelwe phakathi nguMohamed Salah, langokuthi iBafana ayinikwanga umbekwa ngesikhathi ibhola litshaya isandla sikaYasser Ahmed ebhokisini.
“Emhlanganweni oba khona ngaphambi komdlalo bayasichazela ngemithetho, ukuthi kuba ngumbekwa nxa kwenzakaleni lokuthi ikhadi elibomvu liphuma uma kwenzenjani,” kutsho uBroos.
“Ekucineni kulemithetho eminengi kakhulu ngendlela yokuthi akekho owaziyo ukuthi kufanele enzeni. Bheka umbekwa wokuqala, ngitsho lo-Mo Salah ungitshele ngemva komdlalo ukuthi umangele ngesinqumo. Bekuyihlaya ngempela.”
Umqeqetshi weMali, uTom Saintfiet, laye ubewotha ubomvu ngemva kokuthi bebambene ngo 1-1 leMorocco. Kulo mdlalo womabili amaqembu anikwe imbekwa kodwa uSaintfiet ukholwa ukuthi ezakhe bekufanele zinikezwe enye.
“Ngiphinde ngasibona lesi sigameko kuthelevishini. Umdlali wemuva uthinte ibhola ngesandla ebhokisini. Kuyadanisa ukuthi asizange siyithole leyo phenathi,” kutsho uSaintfiet.
Umqeqetshi weBenin, uGernot Rohr, ugxeke inhlangano eyengamele ibhola e-Africa, iConfederation of African Football (Caf) ngemva kokuthi kube lesikhathi lapho i-VAR ibingasebenzi khona emdlalweni wabo leDemocratic Republic of Congo.
“Ngidinwe kakhulu ngezinga labonompempe kule Afcon. Kwenzekani nge-VAR? Bekufanele sithole umbekwa. Kukhona okungahambi kahle kuCaf,” kutsho uRohr.
Ukaputeni weBurkina Faso, uBertrand Traoré, ukhale ngabonompempe ngesikhathi benqotshwa yi-Algeria ngo 1-0. Ucatshulwe yikuthi kukhona lapho unompembe ehambe khona wayobheka ku-VAR, ezinye izinqumo wazithatha engayanga kuyona. —Ubulembu
