admin
Munyori weKwayedza
NYANZVI dzezveutano dzinoti vanhu vachakunda muhondo yekurwisa chirwere cheCovid-19 ndeavo vasiyana nemararamiro akare uye vave kurarama upenyu hutsva kuburikidza nekutevedzera matanho akatarwa ekumisa denda iri.
Vachitaura vari kumuzinda weState House nemusi weMuvhuro uyu mushure memusangano weAd hoc Inter Ministerial Taskforce on Covid-19, gurukota rezvekuburitswa kwemashoko nenyaya dzenhepfenyuro, Senator Monica Mutsvangwa vanoti zvakakosha kuti veruzhinji vararame upenyu hutsva senzira yekudzivirira kupararira kwechirwere ichi.
Upenyu hutsva uhu hunosanganisira kupfeka masiki kana munhu achienda panzvimbo ine veruzhinji, kuita hutsanana nguva dzose nekusaita chitsokotsoko.
“Nyanzvi dzinotiudza kuti vanokunda hondo iyi ndeavo bedzi vanorarama upenyu hutsva hwekuzvichengetedza nekudzivirira kutapurirwa nekutapurira Covid-19. Ndihwo upenyu hutsva hunofanirwa kujairirwa.
“Tose ngatizvigamuchirei uye tozvitevedzevera mukurarama kwedu,” vanodaro.
Sen Mutsvangwa vanoti National Taskforce yakaona shanduko maringe nezvinokurudzirwa nesangano reWorld Health Organisation (WHO) apo mazuva anochengetwa vanhu vachiongororwa kuti vaonekwe kana vane Covid-19 akadzikiswa kubva pa21 kuenda pa14.
“Sezvamava kuziva, Covid-19 chirwere chitsva uye zuva nezuva tiri kuwana ruzivo rwutsva zvakare pamusoro pacho kuti chinodzivirirwa sei,” vanodaro.
Sen Mutsvangwa vanoti Hurumende iri kushushikana zvikuru kuti kunyangwe zvazvo paine chirongwa chemabhazi eZupco ari kutakura veruzhinji mumadhorobha nemumaguta, kune vanhu vakawanda vari kungofamba nzendo zvisina tsarukano.
“Vanhu nekudaro vanokurudzirwa kuti vafambe nzendo dzine chinangwa bedzi, uye avo vanokwanisa kurega kufamba panguva yekuti munhu wose anenge achida kufamba vanokurudzirwa kuti varege kufamba panguva dzinowanda vanhu idzi.”
Vanokurudzira zvakare veruzhinji kuti varambe vakashinga mukurwisa Covid-19 sezvo matanho ose ari kutorwa aine chinangwa chekuchengetedza upenyu.
Sen Mutsvangwa vanoti vashandi vezveutano vanoshandira munharaunda dzakasiyana dzenyika avo vanozivikanwa nekunzi vanahutsanana (village health workers) pari zvino vave kubatsira muchirongwa chekurwisa Covid-19 kuburikidza nekuongorora vane chirwere ichi uye nekutora matanho ekudzivirira kupararira kwacho.
Vanoti zvakare Hurumende iri kusimbaradza chirongwa chekupa chenjedzo pamusoro peCovid-19 munharaunda dzenyika.
Sen Mutsvangwa vanozivisisawo kuti gurukota rezvekudzivirirwa kwenyika nenyaya dzevarwi vehondo yerusununguko, Cde Oppah Muchinguri-Kashiri ndivo vava sachigaro weNational Taskforce uye mutevedzeri wavo vari gurukota redzidzo yepamusoro, sainzi nekuvandudzwa kweruzivo rwemichina, Professor Amon Murwira.
Online Reporter