Online Reporter
Fungai Muderere
KULAMAQEMBU ayisikhombisa omdlalo we-pool koBulawayo asexwayiswe ukuthi aphangise ukuvuselelela izivumelwano labadlali bawo, ngoba engehluleka, bengasuswa kumincintiswano yeligi.
Lokhu kuvezwe yinhlanganiso yeBulawayo Provincial Pool Association (BPPA), ikhuthaza amaqembu ukuthi abhalise abadlali kungakapheli ikhefu lengxenye yesizini ngoNcwabakazi.
Amaqembu okubikwa engemuva kokulandela izinqumo lezi ngagoqela iDragons, Expendables, Kings Pool Club, Lobengula, Raylton, Vultures leZPC.
Kumbiko okhitshwe yinhlanganiso le kuliviki, iBPPA ithe isinanzelele ukuba kulamaqembu angakabhalisi kumbe ukuvuselela izivumelwano lamaqembu. “Kulabadlali abangakavuseleli izivumelwano lamaqembu abo. Abadlali laba kutsho ukuba kabasoke bavunyelwa ukuthi bancintise kumidlalo ezaqhutshwa phakathi kwekhefu lesizini, kunye lokuqedisa ingxenye yesibili yesizini,” kubika unobhala weBPPA uNomore Muzidziwa.
Iqembu elilakho ukuvalelwa abadlali abanengi ngeleZPC Pool Club. Abadlali bayo abasenkingeni nguLunga Mthabiso, Assan Mbwana, Luckson Tatenda Mufudzi, Ndumiso Ncube loForward Nyathi. I-Club Vultures ilabadlali abane uMaybin Chamuka, Morgan Navaya, Farai Nyandoro loTapiwa Pencil.
Elinye iqembu elihlaselweyo ngeleClub Raylton ngomdlali oyedwa uDeclynn Taylor. UWayne Moyo oweLobengula Sharks laye usenkingeni, leClub Expandables kumele ilungise isivumelwano sayo loSherpherd Sibanda, kuthi iKings Pool ixwayiswe ngehlelo zabadlali bayo abathathu uNkosikhona Nyoni, Muchineripi Paswani loReason Shava.
Umdlali wokucina nguCarlos Ndlovu oweClub Dragons.
IBPPA ithe amaqembu kumele asukumele phezulu, alungisise loludaba ukuze kube lokuqhutshwa kuhle kwemidlalo, ngengxenye yesibili yesizini.
Imidlalo eqhutshwa ngaphansi kweBPPA isithole ukunconywa yiZimbabwe Pool Association ngokuthi ihlelwe kuhle, njalo ikhipha ingcitshi zabadlali.
