admin
YiNtatheli kaMthunywa
INHLANGANISO yeWomen’s Coalition of Zimbabwe Education Cluster iveze ukuba kubalulekile ukuba izikolo kunye lomphakathi wamukele abantwana abangamankazana abazithwala besesikolo ukuthi baqhubekele phambili ngezifundo zabo njengalokhu okudingakalayo emthethweni.
Amazwi la alandela ukwanda kwenani labantwana abangamankazana abazithwalayo besesikolo ngenxa yezizatho ezigoqela ukumemetheka komkhuhlane weCovid-19 okubekhona okwabangela ukuthi izikolo zivalwe okwesikhathi eside.
Ekhuluma lentatheli zindaba ngoMvulo kuyonale iviki, uMsekeli wenhlanganiso yeWCoZ uNkosikazi Madrine Chiku uthe ezemfundo zaphanjaniswa kakhulu yikuza kweCovid-19.
Uthe abantwana abangamankazana abazithwalayo kumele babuyele esikolo njengoba umthetho usithi kulilungelo labo ukuqhubekela phambili ngemfundo ngemva kokuzithwala.
“Imfundo yabantwana yaphanjaniswa kakhulu zinhlelo ezifana le-lockdown lapho izikolo ezavalwa isikhathi eside njengendlela yokuzama ukwenqabela ukumemetheka kwe-Covid-19. Lapho abantwana abanengi basalela emuva njengoba babengekho esikolo.
“Nxa sikhangela abantwana abangamankazana, sinanzelela ukuba abanye babo bacina bezithwala bacina betshiya isikolo endleleni.
Kodwa thina sithi abantwabethu abangamankazana kabaphenduke esikolo baphiwe elinye ithuba lokuqhubekela phambili ngezifundo zabo.
“Yebo, bazithwala njalo sebelabantwana kodwa silohlelo lweSecond Chance lapho okumele banikwe elinye ithuba lokuqhubeka ngezifundo zabo.
“Kungakho kubalulekile ukuthi baqhubekele phambili ngemfundo yabo njalo izikolo kunye lomphakathi kumele zibamukele ngezandla zombili. Asikwazi ukuthi elakusasa lisiphatheleni, mhlawumbe abantwana laba yibo abakhokheli bakusasa kungakho kabanikwe ithuba baqhubekele phambili ngezifundo zabo,” utshonjalo uNkkz Chiku.
UNkosikazi Nyaradzo Mashayamombe onguMqondisi ophezulu wenhlanganiso yeTag A Life International Trust njalo engumgcinisihlalo weWCOZ Education Cluster uthe kulilungelo lomntwana wonke ukuthi afunde.
“Siphezulu kohlelo lokuthi wonke umntwana kaye esikolo njalo kakho okumele axotshwe kuthiwa kabhadalelwanga.
“Kulilungelo lomntwana wonke ukuba aye esikolo ukuyafunda,” utsho njalo.
Online Reporter