admin
Ethel Ncube
ZITHWELE amagabha avuzayo izakhamizi zeMahlabathini eNyathi ngemva kokuba kuvele inyoka okubikwa ikhafula imali kodwa imali yakhona iphenduka ibe yizitshubo.
Indaba le yenzakale emavikini asanda kudlula lapho inyoka le ebonwe ngezinye izakhamizi ikhafula imali bagijima bayabiza abanye bathola isihambile imali isiphenduke yaba yizitshubo.
UMthunywa uxhumane lesinye isakhamuzi sakule indawo uNkosazana Senelisiwe Moyo ongomunye owahamba wayabona inyoka le.
“Mina lami ngabizwa ngomunye esithi abantu sebegijimele ukuyabona umhambaphansi okhafula imali sathi sifika sathola inyoka ingasekho kusele izitshubo kuphela okwenza abantu bacabangela ukuthi imali eyayikhafulwe yinyoka yayisiphenduke yaba yizo,” kubika uNkszn Moyo.
Intatheli ixhumane lesinye isakhamuzi uMnumzana Edward Ndlovu oveze ukuba inyoka le ibibhoda emizini yabantu nxa ithi isibulawa icatshe.
“Inyoka le ibihamba ibonakala emizini eminengi ingalumi muntu kodwa izibhodela nxa abantu beyidinga befuna ukuyibulala icatshe ingabonakali. Abacine ukuyibona bayibone isihamba isikhafula imali yeMelika kodwa akula owayitholayo imali yakhona ngoba bathi yaphenduka yaba yisitshubo,” kubika uMnu Ndlovu.
UMthunywa uxhumane lenduna yakule indawo uMtshane Khumalo oveze ukuba udaba olunjalo luke lwafika endlebeni zabo kodwa okokuthi ikhafula imali ibingakakuzwa.
“Indaba yenyoka esihluphile emzini yabantu lwafika endlebeni zami kwakhanya kulomuntu ongancedisa ngokuthi ayikhuphe ayibulale kodwa yamehlula ngacina kume njalo ngodaba lwakhona,” kuphetha induna uKhumalo.
Online Reporter