Online Reporter
Lovemore Dube
I-ZIMBABWE izimisele ukuthi ibe labazagijima kuma-World Relays azaba seBotswana ekuqaleni kukaNkwenkwezi.
Ngalokho kulabahlanu abasuke ngoLwesithathu kukhangelelwe ukuthi bayegijima kweleLesotho ngoMgqibelo.
Ongumqeqetshi omkhulu weNational Athletics Association of Zimbabwe uPhakamile Lisimati uthe bakhangelele ukuthi bayekwenza kuhle.
Isikhathi abazasitshaya yiso abalesifiso sokuthi kumaviki amabili alandelayo bayekwenza ngcono kuso eBotswana, lapho abazadibana lezinye intshantshu zokugijima kumaWorld Relay Championships.
“Sesithumele iqembu lokuyasimela eLesotho. Injongo yikuthi bayezama ukwehlisa isikhathi kumaviki amabili azayo ukuze sibone ukuthi bangenza ngcono kulaso,” kuLisimati.
Uthe imidlalo yama-World Relays yahlukile kuleminye imincintisano. Umahluko yikuthi akulasikhathi esihleliweyo esimele sigijinywe. Kukhangelwa njalo ukuthi ziminjani besekubekwa izikhathi eziphezulu ezingamatshumi amabili lane ukuthi baye eBotswana bayedibana khona.
IZimbabwe ithatha limidlalo ngezinga eliphezulu njalo kulinyathela lokuqala lokuzama ukuthi kube labazamela ilizwe kuma-Los Angeles Olympics ngo2028.
ULisimati uthe balokuthokoza kakhulu ukuyagijima kulimidlalo.
“Siyaqala ukuba labafika kwabathathu asebegijime ama-45 seconds, sincoma labaqeqetshi babo abasekhaya abasebenza nzima,” kutsho uLisimati ngoMvulo.
UThandazani Ndlovu oweHlosi Athletics Club yakoBulawayo ogijime i400m nge45,30 seconds ukuqembu leli elilabo Dennis Hove, Leeford Zuze, Gerren Muwishi loRopafadzo Mzondo.
“Lithuba labo abafana lokuthi baziphakamise njalo bagijimele lelizwe labo. Omunye oseMelika uphathekile ngemihloliso langemidlalo egijinywa phakathi eyama-indoor. Sikhangelele ukuthi yibo abazazama ukungena ku-4x100m relay.”
IZimbabwe isiphakamise izinga kuminyaka esanda kudlula ngamajaha agoqela uTapiwanashe Makarawu loMakanakaishe Charamba asebevela kuma-World Championships lakuma-Olympics.
