admin
Khanyile Ndebele
INHLANGANISO yeAgritex isixwayise abalimi ukuthi baqalise ukulima izilimo ezivandeni lapho abazenelisa ukuthelela ngesikhathi izulu lingani.
UNkosikazi Treggy Mpofu ongumlimisi wakoBulawayo esebenza eAgritex uthe njengoba izulu lingekho lezinsuku, abalimi kabalungise izivande baqale ukulima izilimo abazenelisa ukuzithelela.
“Abalimi bangalima imbhida eyehlukeneyo ezivandeni zabo ebalisa itshomoliya, i-spinach, ihanyanisi kunye lamatamatisi.
Lokhu kuzenza benelise ukuthola isitshebo njalo bathole lokokuthengisa bathole imali,” kutsho uNkszn Mpofu.
Uveze ukuthi umbheda owodwa ungaba yimitha eyodwa ubude uphinde ube lobubanzi bamamitha amathathu.
“Okunye okuqakathekileyo nxa umlimi eseqale ukuhlanyela izilimo zakhe yikwembesa umhlabathi lokufaka umquba emhlabathini wakhe egombolozela isilimo sinye ngasinye.
“Umlimi angafaka amahlamvu lotshani phezu kwezilimo zakhe lokhu kwenza umhlabathi ungalahlekelwa ngamanzi masinyane okuyikho okuzenza uhlale umanzi,” kuchaza uNkszn Mpofu.
Uqoqonsele ukuthi abalimi kufanele bathelele izilimo zabo ekuseni ikakhulu ngoba ilanga litshisa kakhulu kulezinsuku.
“Abalimi kufanele baqakathekise ukuthelela ekuseni ilanga lingakatshisi kakhulu ngoba bengathelela emini lapho ilanga selitshisa kakhulu kwenza amanzi aphele masinya phansi komhlabathi njalo okunye benqabele ukuthelela kakhulu ntambana ngoba amanzi engasala emahlamvini engahlatshwanga lilanga ayabangela imikhuhlane,” kuphetha uNkszn Mpofu.
Online Reporter