admin
Thokozile Mbedzi
ZILOKHU zinkemile izakhamizi zesigabeni seMapanzure eMasvingo ngemva kokuzwa ngesehlakalo sexhegu (830 lesalukazi (80) ababulewe ngasikhathi sinye ngeviki ephelileyo.
Kubikwa uSalathiel Shuro oleminyaka engu-83 yokuzalwa lomkakhe uNkosazana Teresi Rusere oleminyaka engu-80 yokuzalwa bangenelwe ngoguluva bababulala bonke ngobusuku bunye. Ekhuluma lentatheli kaMthunywa uElizabeth Moyo behlelwe yisihluku esidabukisayo njengesigaba.
“Lokhe singelamazwi ngokusehleleyo silapha kuvuke kugongondwe ixhegu lesalukazi esigabeni sethu lapha. Wonke umuntu ulesithuli ngokwenzakeleyo.
“Abadala laba bebehlala lomzukulu wabo oku fomu 3 ngakho ufike ngekhaya wapheka badla njengensukwini basebesehlukana sebesiyalala.
Umzukulu uthe evuka ekuseni ngehola lika 4 eselungiselela ukuya esikolo wananzelela ukuthi isivalo sendlini yokulala kagogo lokhulu besivuliwe.
“Uthe esondela wabona insimbi ende engaba ngange mitha elilodwa yamiswe efasiteleni njalo ilegazi. Wangena phakathi wafica ugogo lokhulu bethe daca phakathi kwechibi legazi bekhanya betshaywe kabuhlungu ngensimbi kanye lokunye okungaziwayo ukuthi yini.
“Umzukulu wahle wagijimela koyisekazi wayamazisa ngalokhu ayekubonile abadala bagijima bayalunguza andubana babikele amapholisa ngalinkemenkeme,” kulandisa uNkszn Moyo.
Isikhulumi samapholisa uInspector Kudakwashe Dewa ebuzwa ngodaba lolu uthe solufikile ehofisini labo esithi.
“Udaba lukagogo lokhulu ababulewe ngobusuku bunye solufikile kithi sisaluphenyisisa abangaba belolwazi ngokuthi kwenzakaleni njalo ngobani abadale lelicala bangatshayela amapholisa ucingo loba ukubikela amapholisa aseduzane labo,” kuphetha ulnsp Dewa.
Online Reporter