admin
Charity Moyo
ZISELE zikhuza umihlola izakhamizi zeNyathi eTarasen kulandela ukuzwa ngenina eliphose latshabalalelwa ngabantwana abathathu ngenxa yobufebe.
Isehlakalo lesi senzakale ngeSonto kuviki ephelileyo.
Kuzwakale ukuthi imuli kaNkosazana Grace Ndlovu oleminyaka yokuzalwa engu-34, isile emlonyeni wengwenya ngemva kokulumathiswa kwendlu ebekulele abantwabakhe ngenye itshamali yakhe ebilobukhwele nanko phela ibinganxuswanga ngalobobusuku.
Umfakazi obikele uMthunywa ngesiga lesi uMnumzana Lazarus Ncube uveze ukuthi abantwana laba bancedwa ngabantu ababehamba ngemota ababesedlula emgwaqweni bebona indlu isingamalangabi.
Ubuye waveza ukuthi ngesikhathi kusenzakala lokhu unina wabantwana wayelele kwenye indlu.
“Inina leli kaliziphathanga ngoba umkalo kahlali lapha useGoli. Ngibona angathi indlu le yalumathiswa ngomunye athandana laye ngoba ezondele ukungaziphathi kukaMaNdlovu ayecabangela ukuthi ulele kuleyondlu,” kutsho uMnu Ncube.
Kucatshangelwa ukuthi inina leli lalilalise abantwana bodwa ngoba lona liletshamali kwenye indlu.
Intatheli ikhulumisane loNkszn Ndlovu oveze ukuthi ngeqiniso indlu yakhe yatsha ebusuku abantwabakhe belele.
Uthe ukuthi wayelele lenye indoda ngamanga abantu bavele kabamthandi esigabeni.
“Abantwabami abathathu baphose batshela endlini ebusuku kodwa angazi ukuthi kwahamba njani njengoba ngangiphumile ngiye emthandazweni.
“Bancedwa ngabantu bezimota abathi bebona indlu isitsha bagijima bavusa abantu ukuze bazongisiza,” kutsho uNdlovu.
Uqhubekele phambili esithi yena wathola abantwana sebephumile endlini kanye lezinye impahla kodwa ezinengi zatshela endlini.
Uthe indaba le isisezandleni zamapholisa njalo asachwayisiswa ngayo.
Online Reporter