admin
Cornelius Luphahla
NGENXA yobuhwaba kulendoda yeSingeni eNkayi ebhaxabule umalukazana wayo qede yamxotsha ngoba edle amasi engaphiwanga imvumo.
Isiga lesi senzakale kuviki ephelileyo.
Kubikwa uMhlupheki Masuku ubhule umalukazana wakhe uSonile Ncube ngenduku wasemxotsha ethi wephula isiko ngokudla amasi engakamdlisi ngokwesiko.
UMthunywa uxhumane loMnu Masuku wachaza ukuthi umalukazana wakhe kalamthetho yikho wamtshaya.
“Okwenza ngatshaya umalukazaana wami yikuthi kalaleli ngoba wathi esenda ngamlaya ukuba uchago uzaludliswa yimi ngokomkhuba ngakho kufanele engaludli. Isimanga yikuthi uthe elesikhatshana endile ngaqala ukuthola uchago lutshontshiwe eguleni.
“Kuviki ephelileyo ngasuka ngisiya etshwaleni ngasengiphenduka sengikhohlwe imfuko yami. Ngithe ngingakangeni endlini yami ngathola umalukazana ethululela uchago esigubhini sakhe ngafika ngama phandle. Kusenjalo ngambona eselunatha yikho okwenza ngangena lenduku ngamtshaya ngahle ngamxotsha ngathi kabuyele kibo bayemlaya,” kuchaza uMnu Masuku.
Kuzwakale ukuthi ngemva kokutshaywa uNkszn Ncube waphuma wabaleka eqonda ngakibo njengoba kuseduzane ngemva kwalokho uyisezala wamlandela wayabikela abangakibo ukuba kasamfuni emzini wakhe. UMaNcube wasuka wayamangala indaba le kusobhuku.
UNkosazana Memory Ndlovu oyisihlobo sika MaNcube ubikele intatheli ukuthi uMnu Masuku ubukhali yikho etshaye umalukazana wakhe ngenxa yochago.
“UMasuku vele uyaziwa ukuthi ubukhali yikho nje etshaye umalukazana wakhe. Ukuthi wamtshayela ukudla uchago ngamanga wamtshayela ukuthi waphelani abantwana uchago.
“Ngikhuluma nje uleminyaka emibili waxotsha umkakhe ethi udlalisa ukudla,” kutsho uNkszn Ndlovu.
Usobhuku wakule indawo uMnumzana Douglas Thebe uchaze ukuthi indaba le useyizwile ngakho ulindele ukuthi ithoniswe.
“Indaba yokutshaywa kukaMaNcube nguyisezala sengiyizwile.Simelele ukuthi sibeke ilanga lokuthoniswa kodwa umkakhe kumele abekhona,” kuphetha uMnu Thebe.
Online Reporter