admin
KWATHI ngomtshado kaDingindawo, kwatshaywa imipululu, imvokloklo abanye sebeze begiqika bebhinqika ngokujabula kuhlangana lokusutha, phela kwakudliwa yonke inonovithi sibi sikagologo.
Uninazala kaDingindawo ubuso bakhe babukhanya bumdambiyana, ehlulukelwe engatshengisi kujabula loba nje wayezama ngamandla wonke ukuthi akufihle.
Lompululu wakhe wawuzwakalela phansi kungatshengiseli ukuthi ngumuntu olendodakazi yakhe enze into enhle kangaka, ebukwa ngitsho layi ncwadi eNgcwele.
Kuthe ngelikade omunye umngane wakhe uMagutshwa wambuza ukuthi kungani engani umoya wakhe uphansi. Loba waqala wazilingana ukuphendula ezitshaya angani kezwanga, waze wakhipha okusemoyeni esithi: “indodakazi yami ingidanisile kakhulu ngoba itshade lindoda,” ekufaka ngolimi lwabondlebe zikhanyilanga “broke soon after pay.”
Phela uDingindawo wayesebenza kuHulumende elipholisa, mhlawumbe babebona ukomela kwakhe yikho okwenza uninazala amchothoze ngocuku.
Kodwa yena uDingindawo wayeyindodana elenhlonipho. Banengi omamazala abalengqondo ezinjenge zikaninazala kaDingindawo, ngikhumbula omunye owakhuza wababaza umhlolo ethi indodakazi yakhe itshada lomalayitsha izinto ezingafundanga eziphila ngodlame, etsho ngomsebenzi wabo abawenzayo wokuchaphisa abantu kanengi laba abangela ncwadi zokuchapha umngcele.
Inengi labo mamazala amadodakazi abo angafunda aqeqetshe abe yisikhwicamfundo, abasafuni ukuthi batshade lomuntu ongani imfundo yakhe lomsebenzi ukhangeleka phansi.
Phela uthando luyisiphofu, njalo lufana lethumba lumila lapho elithanda khona. Abanye omamazala bachothoza sibi sendlu, imota kunye labazali bomkhwenyana wabo.
Bakhohlwe ukuthi longelankomo uyaludla uchago, njalo longela bhasikiti uyangena emakethi. Bomamazala yekelani amadodakazi enu azikhethele omkabo, libathande lingabachothozi.
Ayixabene.
0714355641
Online Reporter