Online Reporter
Brandon Moyo
LOBA bekusaziwa ukuthi umdlalo wekhilikithi yeTest phakathi kweZimbabwe leSouth Africa uzakuba nzima, bekungakhangelelwanga ukuthi elakuleli linqotshwe ngalindlela.
Benze konke okusemandleni abo abadlali bakuleli kodwa kwehlule. Banqotshwe nge 328 runs kumdlalo wakuqala ngoLwebili, eQueens Sports Club. Kuzame uWellington Masakadza, uCraig Ervine loBlessing Muzarabani, akuzange kuphume okubambekayo.
AmaChevrons angene enkundleni ehlose ukuthi abedlulise i537 runs kodwa bakhitshwa bonke ku208 runs. UMasakadza ubele 57 runs, u-Ervine (49), uMuzarabani (32).
AmaProteas yiwo aqale ukutshaya ibhola, bafikisa 418/9 (declared) kudlala kuhle uLhuan-dre Pretorius loCorbin Bosch abatshaye ikhulu munye ngamunye. UTanaka Chivanga, wakuleli, uthole ama-wickets amane.
I-Zimbabwe yathola 251 kuma-innings akuqala, uSean Williams efikisa 137 runs, okube ngowesithathu esedlulisa ikhulu kukhilikithi.
Kuhlandla lama-innings esibili, amaProteas athole 369, uWiaan Mulder ethola 147. Kulesigaba, uMasakadza waba lama-wicket amane. AmaChevrons angene kulanga lesine kusele 18 overs.
Kukhitshwe abadlali abahlanu ngokuphangisa phakathi kwehola elilodwa. Kudonse uMasakadza lo-Ervine abenelise ukutshaya 83 runs nge-wicket lesikhombisa.
Okwakhathesi amaProteas akhokhela nge 1-0.
UMasakadza uthe iqembu kumele lihlose ekuthini lidlala kuhle umdlalo olandelayo, esengeza ngokuthi ukungabi khona kukaMuzarabani, osuke wagula, kulimaze iqembu.
“Siyawa, sivuke. Besilamathuba amahle. Okuhle ngeTest Cricket yikuthi ingatshintsha tshintsha. Ukungabi khona kukaBlessing kusiphazamisile.
“Sihlose ukuthi sinqobe. Sizaqhubeka kulokhu, sibe lokuzethemba, silungise lapho okungaqondanga khona,” kutsho uMasakadza.
Ukaputeni weSouth Africa uKeshav Maharaj uthe balokujabula ngendlela abadlale ngayo.
“Loba siwunqobile umdlalo, kunengi esikunanzeleleyo okumele sikulungise, senze ngcono.
