Online Reporter
Kingstone Mapupu
VARUME vaviri vakapondwa kunzvimbo dzakasiyana kuMberengwa nekuGokwe, kudunhu reMidlands apo mumwe anonzi akatemwa nedemo nemukomana wake vatadza kunzwisisana uye mumwe wacho ndokutemwa zvakare necheya mumusoro ari pabhawa.
Inspector Emmanuel Mahoko vanova mutauriri wemapurisa kudunhu iri vanoti pane murume akapondwa pabhawa reMakandise Bottle Store panzvimbo yemabhizimisi yePoland, kuMberengwa, kozoti mumwe wemubhuku raSiyamanzi, kwaMambo Mukoka, kuGokwe.
“Munyaya yekutanga yekuMberengwa, mufi ainzi Godfrey Mangena uyo asina kuzivikanwa makore ake ekuberekwa, wemubhuku raMadhala kudunhu raMambo Mataruse anonzi akarohwa mumusoro necheya yesimbi ndokutsemuka bhonzo remusoro. Akazoendeswa kuchipatara cheMatibi uko akashaika achangosvika,” vanodaro Insp Mahoko.
Nyaya iyi inonzi yakaitika nemusi wa8 Kubvumbi husiku.
Mangena anonzi akarohwa necheya iyi naLawrence Maphosa (22) anobva mubhuku raTofa kudunhu raMambo Negove, kuMberengwa, uyo akabva asungwa nemapurisa nekuda kwenyaya iyi.
Insp Mahoko vanoti nyaya yechipiri yakaitika kuGokwe kune murume ainzi Sizani Sibelo (30) uyo akafira panzvimbo mushure mekutemwa nedemo nemukoma wake vatadza kunzwanana mukupopotedzana nenyaya isina kuzivikanwa.
“Sizani Sibelo (30) wemubhuku raSiyamanzi, kwaMambo Mukoka, kuGokwe anonzi akatemwa nedemo nemukoma wake, Khangelani Sibelo (40) avo vaigara vose. Anonzi paakaona kuti atema munin’ina wake akafa, akanozvipira kumapurisa nemusi wa7 Kubvumbi,” vanodaro Insp Mahoko.
Vanokurudzira veruzhinji kuti vataurirane mukugadzirisa matambudziko uye votsvaga vayananisi pane kuurayana.
“Hatikurudzire vanhu kurwisana, asi kuti vataurirane kana pane zvanetsa. Kune vane mashoko avanoda kupa kumapurisa mudunhu redu reMidlands vanokwanisa kuridza nhare panhamba dzinoti (054) 2221073 kana 0778 069 322,” vanodaro Insp Mahoko.
Online Reporter