adminTatenda Shuro
MUDZIMAI wemuHarare ari kuchema-chema kuti mukadzi anova nyachide pabarika ravari akamutorera murume zvose nemidziyo yake ndokumusiya ave pamhene.
Milcah Mudiridza akamhan’arira Davison Majachani naSibusisiwe kana kuti Amai Nokhu kuHarare Civil Court.
“Mambo wangu, kune imba yatinayo kuBuhera saka ini ndinogara kuno kuHarare. Amai Nokhu ava mukadzi wechipiri wemurume wangu waakaita ndisingazive. Akaenda kumba ikoko kuBuhera ndokutanga kutengesa zvinhu zvangu uye akanditorera zvinhu zvose,” anodaro Mudiridza.
Anoenderera mberi achiti, “Ndakaenda kwasabhuku mushure mazvo asi vakati vaita mudiki panyaya iyi ndokuenda kwamambo asi murume wangu akaramba kuendako ndosaka ndauya kuno. Iko zvino vave kuda kutengesa sitendi yedu iri kuSouthlea Park saka ndinokumbirisawo vamiswe.”
Mudiridza anoti Sibusisiwe akatorawo mimwe midziyo yake ndokuenda nayo kumba kwake. “Kutaura kuno vakatora mabhara, magejo nemimwe midziyo yangu kuendesa kumba kwavo saka ndaizokumbirawo ndinotora zvinhu zvangu nokuti vaviri ava vandishaisa rugare,” anodaro.
Majachani naSibusisiwe havana kuenda kudare kuti vanopawo mativi avo.
Mutongi Tafadzwa Miti akapa Mudiridza gwaro redziviriro.
Online Reporter