Online Reporter
Fungai Muderere
UJOHANNES “Tshisa” Ngodzo uyakuvuma ukuthi akutshiphanga enkundleni zikaDivision One, ebika ukuthi akulaqembu elincane kuligi le njalo lomncintiswano uyatshisa.
UNgodzo, oqeqetsha iGwanda Pirates kuligi yeZifa Central Region Division One, uveze ukuba uzafukula wonke amaqhinga ukuze iqembu lakhe lenelise ukunqoba amanye, kumbango wokuthola indawo kuligi ephakemeyo eyePremier Soccer League ngesizini ezayo.
“Ngingena kuligi le ngangisithi kumbe kulula, kanti cha, kuyasetshenzwa. Ukuncintisa kuDivision One akulula, kufana lokudlala kunkundla eziphezulu ngoba wonke amathimu afuna ukunqoba. Sesiwubona umdlalo ukuthi umkhulu okunganani njalo kasibuyeli emuva,” kutsho uNgodzo ekhuluma leZimpapers Sports Hub ngoLwesibili ntambama.
Umqeqetshi lo uqhatshwe kulisizini ngesikhathi Ezimnyama Ngenkani zingena kuligi kaDivision One, kulandela ukwenza kuhle kuDivision Two nyakenye.
Ngemva kwemidlalo elitshumi lambili, abafana bakaNgodzo sebebuthelele imiklomelo engamatshumi amabili lasithupha. Kumidlalo le sebenqobe eyisitshiya galombili, banqotshwa emibili, badlala ngokulingana kabili.
Kulokhu, uNgodzo uthe banyathela kakuhle loba nje kumele bakhweze amasokisi nxa befuna ukwehlula amaqembu amabili aphezulu kwabo iSheasham leHardrock FC.
“Indlela zivulekile njalo uhambo lusasekhona. Okumele sikwenze yikungaphambuki endleleni yokunqoba, singabheki emuva. Isicoco sisikhangele.”
Loba bechinsa ukutshibilika enkundleni zikaDivision One, uNgodzo usetshengise ukuthi uyazi akulande edolobheni leGwanda.
Kusenjalo, umgcinisihlalo weGwanda Pirates uGuqukani Mpofu uthe bayasuthiseka ngomsebenzi kaNgodzo labanye abaqeqetshi ngokuletha utshintsho eqenjini.
“Siyabasekela abaqeqetshi bethu ngokuphakamisa izinga labadlali. Kasikhali kangako ngoba lathi siphezulu emsindweni wombango wesicoco seligi. Sindawonye sizawufeza lumsebenzi,” nguMpofu lo.
