admin
UKULIMA yinto eqakathekileyo kakhulu empilweni zabantu ikakhulu labo abahlala emakhaya lasemapulazini. Kodwa kulezinsuku bonke abantu ngitsho lalabo abahlala emadolobheni labo sebesazi ukuqakatheka kokulima yikho loHulumende laye esebanika inhlanyelo kunye lomvundiso ukuze kubonakale ukuthi ukulima kubaluleke kanganani kumkhonomi welizwe lakithi.
Ukulima kwenza isikhathi sokuvuna singafika ungasangeni esitolo usiyathenga impuphu kodwa uzicuphela kwesakho isiphala uyezigayisela lilale ngesibomvu.
Njengoba izulu lisina lisenzenje endaweni ezehlulekeneyo zelizwe, kuqakathekile ukulima ngoba nxa line kuhle, olimileyo ulakho ukuthi athengise amabele akhe kumbe umumbu athole imali engamphilisa lemuli yakhe.
Ngakho-ke njengoMthunywa sikhuthaza wonke umuntu olomhlabathi ukuthi awusebenzise kuhle ukuze kungabi lomuzi ngitsho lowodwa ozakuthi kawulakudla lonyaka.
Kungenzeka ukuthi isikhathi sokulima umumbu sesihambile, kodwa ulakho ukulima ezinye izilimo ezifana lendumba lokunye ukuze imuli yakho ithole ukudla.
Isikhathi besikhona esokulungiselela ngoba ababona ngezomumo womkhathi basixwayisa ngenyanga kaLwezi ukuthi izulu seliseduze silungiselele ukulima kungakho kakho ongasola umuntu.
Ngokufanayo uHulumende kumnyaka odluleyo uphangisile ukunika abantu inhlanyelo endaweni ezinengi okutshengisa ukuba ulesifiso sokuthi kungabi loyedwa othi kalimanga ngoba engelanhlanyelo. Simtshayela ihlombe ngesenzo lesi. Sibonga njalo lohlelo lwakhe lweNtwasa lona oselusenza abantu benelise ukuzitshayela inala ngesikhathi esifanayo belondoloza umhlabathi wabo.
Kuyadanisa-ke ukuthi uthola abanye abalimi abatholiswa umhlabathi ovundileyo belime okuyindinyana batshiya omunye umhlabathi utshaphazeka. Lokhu kubi ngoba kubeka sobala ukuthi isizwe asisoze sithuthuke siyengaphi nxa abantu behlala phezu kwemali.
Abanye uthola bekhala ngokuthi abalayo imali yokuthenga inhlanyelo kumbe eyokudinga abantu abazabasebenzela okuyinto emangalisayo ngoba uHulumende ufundisile abantu ezinye indlela zokulima ezilenzuzo, wabanika inhlanyelo waphinda futhi wabapha lomvundiso, pho kuyabe kumele kwenziweni.
Yebo bakhona abanye abalimi esigwaba ngabo ngoba phela bewusebenzisa umhlabathi hatshi okokudlala.
Laba yibo abantu abathola inzuzo ethe xaxa khathesi umumbu wenengi labo uvele usukhahlela emasimini abo.
Iqiniso okumele sibelazi yikuba akula enye inotho esingayithola ukwedlula ekulimeni. Lokhu kuyingoba umhlabathi welizwe lakithi uvundile njalo ukhulisa kuhle izilimo ezitshiyeneyo.
Isifiso sethu-ke ngesokuba izulu lithi lihamba izilimo zibe sezivuthiwe emasimini abantu bazitshayele inala, iziphala zigcwale phamu njalo lonyaka.
Online Reporter