admin
Ethel Ncube
LISENGUNDA-BAMLONYENI inina lesiqintini seMhlatshwa eTsholotsho eliveze ukuba lilenhliziyo efana lekaFaro nanko phela ngokwesaba umkalo liklinye umntanalo ebelisanda kumbeletha lamngcwaba lodwa esivandeni.
Isehlakalo lesi senzakale kumaviki asanda kwedlula, lapho inina okungasatholakalanga igama lalo, kodwa elileminyaka yokuzalwa engu-38 okubikwa ukuba lazithwala umthwalo ongasi womkalo kungakho lathi lisizwa ukuba umkalo uyaphenduka ekhaya njengoba esebenza kweleSouth Africa wabopha isu lokuthi abulale usane alungcwabe.
Kuzwakale ukuba inina leli labeletha usane oluyinkazana mhlaka 1 Mpalakazi nyakenye.
UMthunywa uxhumane lomunye umfakazi oveze ukuba indoda yenina leli yayisihlale isikhathi eside eGoli.
“Okube kubi yikuthi umama lo uswele isibindi sokuthi agcine ingane engelacala bakhulumisane lomkakhe. Umka-mama lo ubeseGoli okwesikhathi eside waze walingeka wazithwala waba lengane.
“Uthe esizwa ukuthi umkakhe uyaphenduka ekhaya wasethunga icebo leli. Uthe esebelethile waklinya usane walungcwaba yedwa esivandeni.
“Ekufikeni komkakhe wananzelela ukuthi amabele akhe aphuma uchago wambuza kodwa waphika ukuthi alochago.
Ngenxa yokuthi vele okulempondo akufihlwa emgodleni, omakhelwane ngoba babekwazi ukuba ubezithwele bancweba umkakhe indlebe,” kutsho umfakazi lo.
Uqhubekele phambili echaza ukuba amapholisa yiwo acina esevumbulula indaba yonke.
“Abomthetho bathe ngokuzwa udletshana bagijima bafika bambuzisisa wasechaza iqiniso bayaphanda usane lolu abaluthatha baluhambisa esibhedlela seTsholotsho ukuze kuhlolisiswe imbangela yokufa kwalo, inina leli laselibotshwa,” kutsho umfakazi lo.
Amapholisa elizweni kukhasi leTwitter aveze ukuba achwayisisa udaba lapho inina elabeletha laklinya andubana lingcwabe usane esivandeni eTsholotsho.
“Amapholisa eTsholotsho achwayisisa udaba lapho inina elabeletha usane layalungcwaba esivandeni lilodwa,” kutsho amapholisa kuTwitter.
Online Reporter