admin
YiNtatheli kaMthunywa
IZIKOLO ezinengi, eziselizweni lakithi ziphakathi kokuqhuba uhlelo lokufundisa abantwana bezikolo ngokwenziwa kanye lokusetshenziswa kwama-re-usable pads ngenhloso yokuphathisa abantwana abangamantombazana kwezempilakahle.
Obona ngezokuqhutshwa kohlelo lolu njalo esebenzelana ndawonye lenhlanganiso yeSNV uNkosikazi Lindile Ncube ubike ukuba uhlelo lokufundisa kanye lokunikeza ama-re-usable pads solusabalele ezikolo ezinengi zelizwe njalo amantombazana amanengi asewasebenzisa.
Amantombazana, ikakhulu la afunda ezikolo ezisemaphandleni, kawalayo imali yokuthenga ama-pads. Amapads abiza imali nyanga zonke okuyinto ebangela ukuthi abanye abantwana balove esikolo okwenza inengi labo lilahlekelwe yisikhathi sokufunda nxa besesikhathini.
“Abantwana abangamantombazana bafuna ukunakekelwa kanye lokufundiswa ngeziphathelane lobuntombi kanye lempilakahle. Sizwa kuthiwa amantombazana amanengi asebenzisa amalembu, utshani kanye lamahlamvu nxa bengangena esikhathini ngenxa yokuswelaka kumbe ukudula kwama-pads.
“Sesibone kungcono ukuthi sibenzele ama-re-usable pads kanye lokubafundisa ngawo ngoba le kuyindlela elula njalo engadingi imali enengi. Umntwana ulakho ukuwatsha ama-pads la aphinde awasebenzise njalo,” kutsho uNkkz Ncube.
Kuzwakale ukuthi uhlelo lolu lwaqala eMasvingo njalo luyaphathisa okwamagama. Kubikwa abantwana besikolo sebezenzela ama-pads la baphinde bawathengise ngentengo ephansi kakhulu, enganeliswa yiloba ngubani, athengiswa nge $1 emabili.
“Uhlelo lolu selukhona ezikolo ezibalisela i-Gokwe North, Masvingo, Insiza, Mangwe, Beitbridge, Lupane, Mberengwa, Binga, Chivi kanye laseGokwe. E-Masvingo besibakhela kanye lezambuzi ezinkulu, zokuthi abantwana batshintshe ama-pads la,” kuqhuba uNkkz Ncube.
Online Reporter