Vusumuzi Dube
Brandon Moyo
ABANTU abakade bebukele umdlalo weZimbabwe leNamibia baphume enkundleni yeQueens Sports Club bethabile ngoLwesibili emini.
AmaChevrons anqobe izethekeli ngama-wicket amahlanu. Lo bekungumdlalo wesibili ekhokhela amaChevron, kulandela ukunqoba kowokuqala odlalwe ngoMvulo. IZimbabwe ibichinsa ukunqoba iNamibia kumdlalo weT20I.
NgoLwesibili, amaChevrons enze utshintsho kubadlali, kungena uTony Manyonga loTinotenda Maposa endaweni kaDion Myers loBlessing Muzarabani. Iqembu lelizwe liqale ngokujika ibhola, labamba iNamibia ithola 169/6 ngemva kwama over angu-20. Ngesikhathi isitshaya ibhola, iZimbabwe idlale kakuhle yathola 170/5 kuma over angu-18,1.
Ekutshayeni ibhola, abavule inkundla bekunguTadiwanashe Marumani loBrian Bennett. Baqhube kuhle, kodwa uBennett uphume esetshaye amabhola angu-40, ikanti uMarumani udonse waze wafikisa ingxenye yekhulu.
Ekhuluma ngemva komdlalo, uTinotenda Maposa uthe ukunqoba kwabo kukhweze ukuzethemba, njalo kuzabanceda njengoba bezangena kumidlalo yama-qualifiers ngeviki elizayo.
“Sisebenze nzima kumalungiselelo emidlalo yethu leNamibia. Siqhubeka sizama ukuthi sithabise abalandeli. Siyilindele imidlalo yama-qualifiers,” kutsho uMaposa.
Umdlali lo, oleminyaka engu-22 yokuzalwa, uthe ukudlala eQueens Sports Club kube lithuba elihle kuye.
“Ukudlalela enkundleni engakhulela kuyo kube lithuba elihle. Kungiphakamisile. Ngizahlala ngiwukhumbula umdlalo lo.”
Amaqembu womabili azadibana njalo ngoLwesine.
Abadlali bamaChevrons:
Brian Bennett, Tadiwanashe Marumani, Brendan Taylor, Sikandar Raza, Ryan Burl, Tony Munyonga, Tashinga Musekiwa, Wellington Masakadza, Bradley Evans, Tinotenda Maposa, Richard Ngarava.
Online Reporter