admin
Cornelius Luphahla
AMAPHOLISA akoBulawayo asekhuthaze uzulu wakulelidolobho ukuthi ancedisane lawo ukuze enelise ukuqeda amadili abontanga aziwa ngokuthi ngama-vuzu party ngoba kulapho okuba lokuhlukuluzwa kanye lokuganga okucina kuphambanisa ikusasa yabo.
Lokhu kuvezwe emncintiswaneni wezikolo zakoBulawayo ezingu-17 wenkulumo ngeCrime Awareness obusesikolo se-Eveline High School ngoLwesibili kuyonale iviki.
Kumkhankaso lo amapholisa ndawonye labafundi bebezama ukuphuma lendlela yokuvikela ukuhlukuluzwa kwabantwana lokudalwa kwamacala.
Omunye umfundi weHamilton High School uchaze ukuthi inengi labo okwenza lihlukuluzwe yikuhamba kumadili ama-vuzu kanye lokuswela isikhathi sokuxoxa labazali babo ngoba behlala bephathekile kunkundla zokuxhumana, i-WhatsApp bengaziphi isikhathi labantwababo.
“Okudala ukona kubontanga lokuhlukuluzwa yikuthi abazali abaziphi isikhathi sokuxoxa labantwababo kanye lokubafundisa inhlonipho. Lokhu kucina kudala ukuthi umntwana asuke aye kubosowabo ezama ukudinga umuntu angaxoxa laye.
“Kulezondawo kuyenzeka ukuthi ayengeke acine sesiya kumidlalo le ezama ukuyazithokozisa acine senatha izidakamizwa ezidala ukuthi ehluleke ukuzikhuza nxa esesona,” kuveza umfundi lo.
Kumkhankaso lo kuvele njalo ukuthi kuma-vuzu abanye ontanga ikakhulu abangamankazana bacina bedlwengulwa sebedakiwe okudala ukuthi bazithwale kumbe bathole imikhuhlane ethelelwana emacansini.
Ekhuluma kulo umkhosi uAssistant Commissioner Operations and Crime wamapholisa koBulawayo uEdmore Mlambo uchaze njalo ukuthi abazali labantwana kufanele bancedisane ngendlela ezehlukeneyo ukuze benelise ukunqoba amadili ama-vuzu lokuhlukuluzwa kwabontanga.
“Badala labantwana asincedisaneni lamapholisa ukuze senelise ukunqoba ukuhlukuluzwa kwabontanga. Thumezani imilayezo ku-whatsApp kumbe kuma-suggestion box amapholisa nxa kukhona izindlu ezenza amadili la kumbe nxa kukhona okunye okwenziwa ngabantu okungekho emthethweni.
“Fundisani abantwabenu umthetho babe lobuntu ukuze babone ububi bamadili la,” kuphetha uMlambo.
Online Reporter