adminIMBONGI kule inkondlo isazisa ngendumela. Nxa ngifunda kuhle ngithola ukuba lokhu okukhulunywa lapha kuhambelana xathu lamahungahunga. Umehluko nxa ungabe ukhona ungaba mncane kakhulu.
Njengamahungahunga indumela zihambisa izinto ezinengi ezinjengemikhosi, kanye lokwazisa ngezinto ezinhle ezinjengamanye amazwe. Imbongi iqala ngokubabaza ukwenza kwazo indumela lezi.
Kuyavela sobala kule inkondlo ukuthi imikhosikhosi esiyizwayo izwakala ngazo indumela. Ihle izwakale ngendumela leyo mikhosi nxa izabakhona kumbe ibekhona. Amazwe amahle lawo lanxa abantu bengafikanga kuwo azwakala ngendula, ngokufanayo lawo amazwe amakhulu azwakala ngendumela lezo. Ngendlela efanayo labantu ababi labo bezwakala ngazo indumela. Abahle labo futhi bezwakala ngendumela.
Ulutho oluthile luthi lusavela nje lungakakhanyisisi indumela seziluthethe zayalufikisa ezindlebeni zabantu abakude.
Indumela yizo ezenza ukuthi ngesikhatshana izinto ezithile zibe sezizwakale kude. Imbongi iyakusola njalo ukwenza kwendumela ngoba nanku ithi amacebo wonke athi esacetshwa ezwakale esexoxwa layizihambi. Zibuzwa ngalokho izihambi lezo zizwakale zithi lokho zikuzwe ngendumela.
Ngenxa yokuhambisa ngitsho lendaba ezisacetshwayo imbongi isibuza indumela ukuthi kanti ilendlebe enganani, njalo zingaki lezondlebe ezizwa konke lokusensitha okucatshileyo, okungakafinyeleli kwabanengi? Iyabuza imbongi ukuthi kanti kungani kuzo indumela indaba zingalali phansi? Emidlalweni yonke abantu bakhuluma ngazo indumela ngoba nxa bebuzwa ukuthi bafike njani lapho bathi bazwe ngendumela.
Akusikho emidlalweni kuphela lapho abantu abaphethe khona indumela kodwa lemasontweni abantu lakho baphethe daba lunye lwendumela. Ematshwaleni, kanye lasemalimeni abantu bakhuluma ngazo indumela, kungaba yikuthi abanye bazithole belapho nje ngazo indumela. Indumela lezi kusobala ukuthi yizo ezihambisa indaba zifike kude. Iyakhala imbongi ngezenzo zendumela osekuvela ukuthi kazilunganga.
Ilesicelo esikhulu kundumela imbongi ithi indumela kayiyekele izindaba zabafowabo kanye lezabonina laboyise.
Iyaphambili ithi indumela kayeke lezindaba zabokhokho bakhe abangasekho kungani engadinwa ngazo? Isimanga yikuthi lezindaba zezingane kukhanya indumela izenza ezayo okucunula imbongi ukwenza iphethe inkondlo yayo ngemibuzo elandelayo?
“Ye! We ndumela we ndumela, Kanti wen’undlebe zingaki, Wen’ obik’e zabany’ ungadinwa, Kant’ ezakho zona zobikwa ngubani?”
Online Reporter