admin
Cornelius Luphahla
IZAKHAMIZI zeMbembesi eLupane zikhala ezimathonsi ngempisi eseziziqedele izifuyo okulakho ukubangela njalo ukwehla kwenani lomhlambi wesizwe.
Impisi lezi kubikwa seziqede izifuyo zezigabeni ezigoqela iMlonyeni, Mafa, Somgolo kanye leSipopoma lapho osokuvele ukuthi sekulenkomo ezedlula i-40 esezadliwa zinyamazana lezi.
Okunye okwenza izakhamizi lezi zikhathazeke kakhulu yikuthi inkomo lezi zizisebenzisa njalo ukulima okutsho ukuthi njengoba sezilahlekelwe zinkomo zazo zizabulawa yindlala kumnyaka ozayo.
Esinye isakhamuzi sesigabeni seMafa, uMnumzana Collet Moyo ubikele uMthunywa ukuthi umnewabo wadlelwa inkomo kanye lembuzi kumaviki aphelileyo zimpisi lezi.
“Impisi sezihluphile kule indawo ngoba seziqede izifuyo zethu. Ngikhuluma nje emavikini amabili adluleyo zilume inkomo kamnewethu kodwa yabaleka yazofela ekhaya. Kuthi kuyonale iviki ephelileyo zibuye zamdlela njalo imbuzi ezingu-8 sathola inyama yembuzi ezintathu kuphela ezinye ziphelile,” kutsho uMnu Moyo.
Esinye njalo isakhamuzi sesigabeni seMlonyeni, uNkosikazi Sithabile Ndlovu wengezelele njalo ngokuthi esigabeni sakibo impisi lezi zidla kakhulu obabhemi.
“Kithi impisi lezi zidla kakhulu obabhemi, ngikhuluma nje kuthange zidle abami ababili ngasikhathi sinye. Akusela muntu olesifiso sokuthenga isifuyo ngoba esesaba ukuthi sizadliwa zimpisi. Isimanga yikuthi impisi lezi lesibayeni ziyangena zibambe izifuyo zibaleke lazo,” kuchaza uNkkz Ndlovu.
Ekhuluma lentatheli uMnumzana Thamsanqa Ndebele oyisakhamuzi esigabeni seSomgolo uveze ukuthi impisi lezi zihamba zimbili njalo indlela ezidla ngayo izifuyo iyasolisa kakhulu.
“Mina kuyangixaka ukwenza kwalezi impisi ngoba zimbili kodwa uthola zidle imbuzi ezingu-8 zatshiya inhloko kuphela. Kwesinye isikhathi uthola zidle inkomo zatshiya amangqina lenhloko, okusuka kudanise yikuthi njengoba impisi ziyinyamazana ezincane ziqeda njani inkomo yonke zimbili.
“Ngokubona kwami impisi lezo ngezabantu ngoba kudala sasisazi ukuthi impisi kayenelisi ukudla inkomo kodwa khathesi uthola idle inkalakatha yenkunzi,” kuphetha uMnu Ndebele.
Imizamo yokukhulumisana lesikhulumi seParks and Wildlife Authority yehlule ngoba ucingo belukhala lungadojwa.
Online Reporter