admin
AMAGWILI athandwa ngumuntu wonke njalo singazilimela lathi ezivandeni zethu. Zinengi izindlela zokuwapheka ezehlukeneyo. Izindlela ezehlukeneyo zenza ukuthi angakudaki. Lamuhla sizakuthi fahla ngenye indlela yokupheka amagwili esithi ngamagwili abucuzekileyo.
Okudingakalayo
i Amagwili angu-5 amakhulu
ii Uchago ngenkomitsho yetiye
iii Imajarina (5 grammes)
iv Uphini lokubucuza (masher) nxa ulayo
v Ibilebile, isawudo, i-cheese, i-grater, umganu wokupheka ku-oven
vi. Itshukela ngokuthanda kwakho, umganu wokubucuzela amagwili
Ukupheka
1 Qala ngokugezisa amagwili aphele yonke inhlabathi. Wahlube izigogo uwaphosele emanzini aqandayo, aqobaqobe iziqana ezincinyane. Wapheke okwemizuzu engamatshumi amabili (20 minutes) kumbe aze avuthwe.
Wahlabe ngefologwe ukuze ubone ukuthi asevuthiwe.
2 Khathesi waphakululele emganwini wokuhlanganisela, wahlanganise ubonda uthela uchago olubilileyo.
Qhubeka ubonda ufake lemajarina, bonda kuhlangane kungasali iziqa ufake isawudo lebilebile.
3 Faka njalo itshukela ngokuthanda kwakho. Thululela emganwini wokubhekhela.
4 Thatha ifologwe udwebe izindledlana phezulu kwamagwili. Grater i-cheese uyivuvuzele amagwili.
5 Faka amagwili ku-oven etshisayo . Yekela ku-oven kuze kube luthuthuvana.
6 Bona ukuthi akutshi kodwa kuvuthwe kuhle.
7. Lokhu kulungele ukudliwa lenyama egayiweyo (mince meat)
Inyama egayiweyo (mince meat)
Okudingakalayo
1 1kg yenyama egayiweyo oyithenge ebhutsha
2 Ihanyanisi eyodwa enkulu
3 Inkezo zokudla ezimbili zamafutha okupheka (cooking oil)
4 Amatamatisi amabili amakhulu, inkezo ezimbili zefulawa, ukhezo lwetiye i-curry powder, i-quarter yokhezo lwetiye ibilebile lesawudo
Ukuphekwa
Geza izandla zakho
1 Hlikiza inyama egayiweyo ngezandla, faka amafutha embizeni uwenze atshise
2 Qoba ihanyanisi uyikhanzinge ibe luthuthuvana.
3 Vuvuzela i-mince meat ukhanzinge.
4 Lungisa amatamatisi ngokususa izigogo, waqobe kumbe wagirethe nge-grater.
5 Thela ifulawa, isawudo, ibilebile, thela njalo amanzi.
6 Pheka eziko uyekele kuxhwathe emlilweni olingeneyo okwemizuzu elitshumi.
7 Phenduphendula ubone ukuthi akutsheli.
Ukudla
Dlana amagwili abucuziweyo lenyama egayiweyo (mince meat) uzikholisele.
Online Reporter