admin
ZULU Ka Ndaba! Siyadibana njalo mahlabezulu siqhubekela phambili ngokulitshayela ihlombe ngempumelelo yenu empini yomanyano kazulu lamapholisa elizweni lonke jikele. Sithi thina halala, hlalani linjalo bakwethu lingadinwa.
Kundatshana yethu edluleyo sixoxe ngezibonelo zobubi bokwephula umthetho ezigoqela inkemenkeme yendaba eyatshiya izakhamizi zakoMahlanzana eNkayi zibambe owangaphansi ngemva kokuba esinye sezakhamizi zakulesosigaba sitshaye sabulala umntwana oleminyaka yokuzalwa engu-11 ngoswazi. Kunzima bakwethu!
Kule indatshana yethu sisungula ngesithembiso engasibika kundatshana le esacina ukucebisana khona ngezakoCALA loyise uSigilamkhuba ngisithi ngizaphatha inhlelo zeZimbabwe Republic Police (ZRP) esingangena kuzo ukuze siphathisane lamapholisa ethu ekulawuleni umthetho ezikhokhelwa nguzulu eze-Community Policing. Inhlelo lezi zijonge ukuveza ukuba icala selaba yingxenye yempilo yoluntu emhlabeni wonke jikelele ngakho ke, ukulivikela kumbe ukulinqoba, kungumlandu wethu sonke abayindalo yoluntu. Ngokunjalo, inhlelo lezi zisipha amandla, amasu lamacebo okwenqabela, ukulwisana lokuphungula ukudalwa kwamacala phakathi komphakathi. Phela angithi amacala la ande ukudalwa phakathi kwethu, ikakhulu khatshana lalapho okuyabe kulamapholisa khona.
I-Community Policing liqoqo lenhlelo ezisekelwa kakhulu emazweni omhlaba wonke jikele njalo kuleli ilizwe lethu leZimbabwe, inhlelo lezi zisekelwa kakhulu nguHulumende lozulu wonke ngoba besazi ukuba akula mapholisa angaphumelela engelalo lolosekelo lukazulu. Iqoqo leli ligoqela inhlelo eziyimibono kazulu engaphathisa ukuphungula ukudalwa kwamacala ezigabeni zabo lenhlelo zonke ezijwayekileyo esezake zasetshenziswa zabonakala ukuba ziyasiza.
Zigoqela olwe-Community Relations and Liaison Officers (CRLOs); Police Constabulary; Neighbourhood Watch Committee; Home Officer Scheme; House Under Supervision Scheme; Junior Police Call programme; Business Against Crime Committees; Crime Consultative Committees; Bases / Posts / Satelites lezinye inhlangothi zamapholisa ezibhekana lamacala athize anjengawe zifuyo, ukuhlukuluzana kwabantu lezinye ezinjalo.
U-Community Relations and Liaison Officer (CRLO) ngumpholisa omela inhlelo zonke eziphathelane lomanyano kazulu lamapholisa endaweni yakhe lapho asebenzela khona. Isibonelo kusenkambeni ekhokhelwa ngesithi nguOfficer-in-Charge Station esipholiseni, inkamba ezifana le ZRP Luveve kumbe ZRP Lupane. Kubakhona njalo abanye abakhokhela amaCRLO wonke esiqintini samapholisa esigoqela ama-Station kumbe inkamba ezithile umzekeliso kuyiZRP Lupane District egoqela lenkamba ezibalisela phakathi iNyamandlovu iNsuza lezinye.
Ku-District lapho kuyabe kuloDCRLO onguye okhokhelwa ngumkhokheli wamaCRLO esabelweni sinye ngasinye elizweni kumbe isabelo esilawula amacala athile ngokwesipholisa njenge-Criminal Investigation Department (CID). Lo waziwa ngelikaPCRLO kumbe isikhulumeli samapholisa esabelweni esithile kumbe kuhlangothi oluthile olwamapholisa.
Bakwethu, amaPCRLO akhokhelwa ngobona ngezobudlelwano bamapholisa onke jikelele lozulu, Chief Police Spokesperson uSenior Assistant Commissioner Charity Charamba. Awu bo yena ke usesixhuma sonke kumkhokheli wamapholisa onke eZRP, Commissioner General of Police u Commissioner General, uKhmrd Augustine Chihuri.
Yiyo-ke indlela ehanjwa zinhlelo zenu zonke bakwethu eliyabe lifisa ziphathwe ngamapholisa ukuze lenqabele ukudalwa kwamapholisa. Izikhalazo zenu lazo zilandela leyondlela kusukela lizethula enkambeni zonke zelizwe emahofisini aboCRLO kuze kuyefika ekuphendulweni kwazo. Impendulo iza kusukisela ngemva kwemizuzwana yokucwayiza kweso nje kuze kuyefika amalangeni angu-30 kusiya ngokuthi yisikhalazo bani.
Kwamanye amankampani, abaphatha amahofisi esikhuluma ngawo lapha basebenzisa amagama ahlukeneyo agoqela oPublic Relations Officer kumbe Communication Officers. Ngokunjalo lizananzelela ke mahlabezulu ukuba yihofisi yabangane benu le. Yehlukile kakhulu kuleyo elifikela kuyo kungakazakali ukuba lidinga ncedo bani, i-charge office.
Phela i-charge office ilebizo elizwakala sengathi uvele uyabe usiyakwetheswa icala! Hatshi, i-charge office iyafana nje le-reception bakwethu. Kulapho esifikela khona sonke anduba sikhonjwe ihofisi ethile eqondana loncedo esiyabe siludinga emapholiseni ngalesosikhathi, enjengekaCRLO. Sidibane kundatshana yethu ezayo sesiqhubekela phambili ngenhlelo ze-Community Policing lapho esizaqalisa ngokuzwa ukuba sitholani njengomphakathi koCRLO.
Umlobi utholakala ku-(04) 700171-9 Extension 3193; 0735752386/0716616987/ 0783185092 / [email protected]/ [email protected]/[email protected] .
Online Reporter