admin
Pumulani Mpofu
UMNTWANA uyisibusiso njalo uletha intokozo lapho esethe wazalwa ngoba siyabe sesikhangelela impumela enhle kanye lekusasa elihlelekileyo. Ukuza komntwana kuyaqakathekiswa esintwini yikho abantu belungiselela ukuzalwa komntwana ngokubana umama anathiswe izihlahla ezimqinisayo njalo ezimenza alungele ukubeletha umntwana olempilakahle enhle.
Kukho konke okwakusenziwa incwadi yokuzalwa ngeyinye into eveza sobala ukubana umntwana uyalungiselelwa ukuze abe lekusasa elihle. Ukuthathwa kwencwadi yokuzalwa kuyinto elula njalo eqakathekileyo ezimpilweni zabantu bonke jikelele. Ekuzalweni komntwana esibhedlela loba ekilinika unina womntwana wandise ukuphiwa incwadi ethiwa yi-birth confirmation record. Le incwadi iyabe iveza ukubana umntwana lo wazalelwa esibhedlela loba ekilinika.
Uma usulayo sungathatha isithupha sakho kanye lesomkakho liqonde emahofisini kaHulumende ukuze uyethathela umntwana incwadi yokuzalwa. Bonke abazali bomntwana kumele babekhona. Nxa abazali betshadile umtshado obhalisiweyo, otshadwa emthethwandaba loba esontweni uyaphatha yona nje lezithupha zenu bazali liyethathela umntwana incwadi yokuzalwa.
Kule iviki ngizathanda ukuthi sixoxe mayelana lokuqakatheka kwencwadi yokuzalwa. Okokuqala incwadi yokuzalwa ilusizo ngoba itsho ubunguwe bomuntu njalo lokuthi ungubani. Incwadi yokuzalwa iqakathekile njalo ngoba iyatsho ukubana uzalelwe ngaphi njalo lokubana abazali bomntwana bathiwa ngobani njalo inombolo zabo zezithupha zithini. Incwadi yokuzalwa njalo yenza kube lula ukwazi ukubana iminyaka yomntwana mingaki njalo iyancendisa nxa sokuthathwa isithupha.
Incwadi le iqakathekile njalo esikolo ngoba bayabe besenzela ukubana umntwana aphatheke kumidlalo eyenzakala esikolo njalo lokubana nxa besiyavakatsha njengesikolo bakhone ukubana bahambe labo ukuze nxa kungaba lengozi thize benelise ukuthi bzi ukubana abazali bomntwana bathiwa ngobani.
Incwadi yokuzalwa iqakathekile njalo kubaqhatshi ukuze bazi ukubana ababasebenzelayo badala okunganani njalo sebevunyelwa yini ngumthetho ukubana basebenze kungekho cala. Ubuhle bencwadi yokuzalwa buyakhanya njalo lapho umntwana sekumele athole incwadi yokuhamba okuthiwa yiphasipoti. Okunye njalo nxa umntwana esechaphela kwelinye ilizwe umthetho uyabe ufuna ukubana ubone ngempela ukubana umntwana lo uyabe ehamba labazali bakhe. Konke lokhu bakuthola encwadini yokuzalwa ngoba kuyiyo eveza sobala ukubana umntwana lo uzalwa ngobani. Kuqakathekile sibili ukubana abazali bathathise ingane zabo incwadi zokuzalwa ukuze bebe lekusasa elihle .
Asihlanganeni njalo kuviki elizayo.
Umlobi utholakala kukheli ethi [email protected] loba kunombolo ezithi 0773165055.
Laku www.trinityproject.biz
Online Reporter