adminCornelius Luphahla
KUBE yisiphansi phezulu elokitshini le Cowdray Park koGarikayi lapho amanye amadoda abhuqane akhiphana amazinyo ngemva kokuhlangana emnyango wendlu kamazakhela ngesikhathi bezomvakatshela.
Impi le yenzakale ngoLwesithathu kuviki ephelileyo lapho uLivious Ncube (26) lo Rebel Moyo (25) abavubane kwaze kwahela kozeleyo bebanga uNkosazana Jenny Moyo (42) ohle wabala ngemva kokulwa lokhu.
Kuzwakale ukuthi uMnu Ncube wasuka kulelilokitshi e-terminus esiyanatha utshwala etshabhini yakoMakhuphe ekule indawo kwathi sokusebusuku waseqonda kumasihlalisane wakhe uMaMoyo okuyikho owahlangana khona loMnu Ncube emnyango bahle baqala ukulwa.
UMthunywa ukhulumisane loNkosazana Samukelo Ndlovu ongumakhelwane kaNkszn waveza ukuthi yena wezwa sokungumsindo komakhelwane wakhe wathola abantu besilwa kabuhlungu.
“Mina ngezwa umsindo omkhulu komakhelwane wami ngavuka ngaqonda khona ngathi ngifika ngathola uMoyo loNcube betshayana kabuhlungu lami ngamemeza abantu ukuthi bazongincedisa ukulamula. Kuthe kunjalo waphuma uMaMoyo lenduku wababhuqa kakhulu baze bekelana babaleka.
“Ngemva kwalokho wathi bonke kasabafuni bengasabuyi futhi emzini wakhe. Okubuhlungu yikuthi besebekhumulane amazinyo ngapho besilwa khonapho,” kutsho uMnu Nkszn Ndlovu.
Ekhuluma lentatheli uMnumzana Thabo Nkiwane uchaze ukuthi uyadana ukuthi amadoda la ayethembeni aze athandane loMaMoyo wona esazi ukuthi uyatshaya.
“Mina into engimangalisayo yikuthi amadoda la ayelezibindi bani aze azimisele ukuthandana loMaMoyo yena esaziwa ukuthi uyatshaya. Ngikhuluma nje kakho umuntu ongamaziyo uMaMoyo ematshabhini wonke alapha eCowdray Park ngoba lanxa enatha uyabe ethwele induku yakhe atshaya ngayo abantu,” kutsho uMnu Nkiwane.
UMnu Ncube uveze ukuthi kakwazi ukuthi kwahamba njani aze atshaywe nguMaMoyo ngoba wayedakwe kakhulu ngakho ngeke alandise okunengi.
“Mina kangikwazi ukuthi kwakuhambe njani ngize ngilwe koMaMoyo njalo kangibonanga ukuthi wangitshaya njani ngoba ngangidakwe kakhulu ngakho ngeke ngikutshele lutho,” kutsho uMnu Ncube.
Ebuzwa ngale indaba uNkosazana Moyo uchaze ukuthi kafuni kudelelwa ngabantu njalo kasoze alandise okunengi ngendaba yakhe le ngoba seyadlula.
“Mina okwenza ngitshaye abantu yikuthi kangifuni kudelelwa ngabantu njalo ngeke ngikutshele ukuthi abafana labana ngabatshaya njani ngoba sokwadlula. Okokuthandana labo lokho ngokwami bona babengilandelani bengibona ukuthi ngimdala kulabo,” kuphetha uNkszn Moyo.
Online Reporter