adminCornelius Luphahla
ZIBAMBE oluphuphumayo izakhamizi zelokitshini leNketha 6 lapho enye indoda ebhuqe umkayo kabuhlungu yaze yamephula ingalo ithi uphekeleni isitshebo esinengi.
Isisanasana lesi senzakale ngoMvulo kuviki ephelileyo lapho uNkosazana Tracy Phiri atshaywe khona ngumkakhe uMnumzana Linos Nkomo waze wamephula ingalo yesandla sokudla ethi kungani epheke inyama yenkukhu yonke.
Ekhuluma lentatheli uMnumzana Bheki Moyo uveze ukuthi wezwa umsindo komakhelwane wakhe wagijima wayalamula wathola uNkomo etshaya umkakhe ngomphini wehloka.
“Mina ngezwa umsindo uMaPhiri ememeza ecela abantu ukuthi bezomlamulela. Kuthe kunjalo ngagijima ngayafika khona ngafika ngangena endlini ngathola uNkomo etshaya umkakhe ngomphini wehloka umkakhe seze wawela phansi.
“Ngafika ngalamula kodwa kangizange ngananzelela ukuthi uMaPhiri wayesephuke ingalo ngaze ngezwa ngomkami ngemva kwensuku ezimbalwa,” kutsho uMnu Moyo.
UMthunywa ukhulumisane loNkosazana Tapelo Maphosa oyisakhamuzi kule indawo obikele intatheli ukuthi uyamangala ukuthi kungani uNkszn Phiri engayi esibhedlela seze wavuvuka ingalo yonke.
“Kwathi ngemva kokuba uMaPhiri atshaywe ngumkakhe wabuya kimi wathi uboleka imali yokuya esibhedlela ngoba wephuke ingalo. Kwaba ngumnyama ngoba ngangingelayo ngakho kangimuphanga. Ngemva kwamalanga amabili abantwabakhe bamthumezela imali yokuya esibhedlela kodwa kazange waya sokuze kulamuhla.
“Ngathi ngimbuza ukuthi kungani engayi esibhedlela wathi kafuni ukuthi umkakhe abotshwe ngakho uzahlala aze asile. Isimanga yikuthi ukhuluma kanje ingalo yakhe ivuvukile size yagoba,” kutsho uNkszn Maphosa.
Ebuzwa ngale indaba uNkszn Phiri uthe ukuxabana kwakhe lomkakhe ngeke akubikele muntu njalo ingalo yakhe yalimala ngemva kokuwa phezulu kombeda elele ebusuku.
“Mina ngeke ngikutshele ngokuxabana kwami lomkami ngoba yimfihlo yethu. Labo abakutshelileyo kabahle baqedise njalo ingalo yami yanyela ngize ngiwe embhedeni ngilele ebusuku. Okwenza abantu bethi ngatshaywa ngumkami yikuthi ngalimala mhla size sixabane lomkami,” kuphetha uNkszn Phiri.
Online Reporter