admin
IMPELAVIKI elandelayo izabe inzima kumqeqetshi weHighlanders uMandla “Lulu” Mpofu ngoba kungenzeka ahle avalelise.
Udletshana olufinyelele iphephandaba likazulu luveza ukuba umqeqetshi lo utshelwe ukuthi kumele anqobe imidlalo emithathu elandelayo.
Ulomthwalo onzima uMpofu nanko udliwe njengomfana omncinyane yiBulawayo City ngeSonto, iHighlanders inqotshwa nge 1-0.
Bekungakhangelelwanga ukuthi iTshilamoya itshile inhliziyo zabasekeli bayo ngesikhathi iqembu lidinga imiklomelo yonke.
Kumidlalo emine, uMpofu usenqobe kanye. Kulimpelaviki udibana leqembu le-Tenax enkundleni yeSakubva eMutare. Uzakuba mude umango wokuya kuleyondawo.
UMpofu engehluleka ukunqoba, ngokutsho kwabafakazi abaqotho, uzabe ezifake engozini yokuthi alindele ukuxotshwa.
NgoMvulo kubikwa inkokheli zeqembu, ezikubhodi, zithumele izwi lokuthi uMpofu azame ukubopha ziqine ngoba isimo seqembu sibi.
“Umuntu wonke eqenjini ukhathazekile ngesimo seqembu. Umqeqetshi uphiwe imidlalo emithathu elandelayo ukuthi azame ukuthola umklomelo. Kungehlula asazi,” kutsho ilunga leHighlanders eliseduzane lodaba lolu.
Kubikwa labaxhasi beHighlanders, inkampani yeSakunda kuzwakale ukuba badanile ekuthini imali abayifake eqenjini kukhanya angathi ayisebenzi ngendlela efaneleyo. Ukunqoba kweBosso, yikukhula kwabasekeli bayo ababalisela inkampani yeSakunda.
NgoLwesithathu ekuseni, isikhulumi seSakunda uRonald Moyo uthe angeke atsho amanengi ngodaba lomqeqetshi.
Iphephandaba likazulu lixhumane loMpofu, andubana ayelolonga abadlali wabika ukuba ukunqoba sekubalulekile okwakhathesi.
“Eqinisweni sekumele sinqobe. Lami angeke ngithi sidlale kuhle kumdlalo odluleyo. Amaphutha ethu sizawalungisa,” kutsho umqeqetshi lo.
UMpofu ngeviki edluleyo wabika ukuba labadlali bakhe bayaxegisa. Umqeqetshi wakutsho lokhu sengathi uyaphosisa kodwa eveza ukuthi kukhona okutshaya amanzi ngendlela abadlali abaligiqa ngalo ibhola.
Kodwa, umlandu ukuye njengomqeqetshi ukuthi akulungise lokhu, kungehlula uzatshengiswa indlela yokuya ekhaya.
Ubunzima baleliqembu buhlukumeza labalandeli bayo abasebekholwa ukuthi kayisela mnkantsho iBosso nanko sebenqotshwa ngamaqembu amancane.
Umqeqetshi uthe katshaywa luvalo ngoba usawuphethe umsebenzi. Uthe uzwela abadlali ubuhlungu ngoba ukwehla kweqembu kubulala ikusasa labo.
“Ngezinye izikhathi ngivele ngizwele abadlali ubuhlungu basebenza kanzima, kodwa akuphumi lutho enkundleni.
“Ngihlala ngibatshela ukuthi okuqakathekileyo yikusasa labo ebholeni ngakho kumele badlale ngokuzimisela kuyo yonke imidlalo,” kutsho umqeqetshi lo.
Kumtshiya egcekeni lemibuzo ukuthi uzenelisa na ukukhipha iBosso kusimo lesi ekuso ngoba ingaqhubeka idlala ngendlela eyenza ngayo ingayagijima ku Division 1.
Online Reporter