adminKhanyile Ndebele
KULENDODA yenkomponi yeMandalay eMguza ehlasele enye ebihlala layo ngepiki ekhanda yafa kubangwa ingubo kunye lendawo yokulala.
UPaul Mpofu oleminyaka engu-50 yokuzalwa kubikwa uhlasele uArtwell Ndlovu oleminyaka engu-60 yokuzalwa mhlaka 21 Nhlolanja ebusuku bebanga ingubo yokwembatha.
Isikhulumi samapholisa akoBulawayo uAssistant Inspector Nomalanga Msebele uthe ababili laba akade behlala bonke babe lokungazwani ngalelolanga uMpofu wacina esebulele uNdlovu.
“Amadoda la womabili aba lokungezwani kubangwa ingubo yokwembatha kunye lendawo yokulala.
“Ngaleso sikhathi uMpofu wadobha ipiki eyayikhonapho wamtshaya ngayo ekhanda kanye okwahle kwabangela ukuba aqale ukopha ngamakhala lasekhanda wahle wafa,” kutsho uAsst Insp Msebele.
Uqhubekele phambili ekhuthaza uzulu ukuba ehlukane lomkhuba wokulwa.
“Sikhuthaza umphakathi ukuthi uxazulule ingxabano ngokuthula ukuze kuvikelwe ukulahleka kwempilo,” kutsho uAsst Insp Msebele.
Online Reporter