admin
KUNYUKE amaphaphu kuvezwa indaba yenyanga elodumo endaweni ebizwa ngokuthi Germiston, eJohannesburg kweleSouth Africa ethi iyenelisa ukwelapha yiloba yiwuphi umkhuhlane nje kungenxa yenkalakatha zenhlathu ezimenza yenelise ukukhuluma labaphansi.
Inyanga le uSibusiso Ngobese ithi yayingeke yenelise ukwenza umsebenzi wayo ngaphandle kwenyoka lezi.
“Amadlozi akithi akhuluma lami ngenyoka lezi eziyisibusiso kimi.
“Amandla okwelapha engilawo avela kizo. Ziyangitshengisa ukuthi ngelaphe njani izigulane lokuthi ngisebenzise wuphi umuthi ekuzelapheni,” nguNgobese lo.
Uthe waqala ukuhlala lenyoka lezi ngomnyaka ka2005.
“Ngiyinyanga yamanzi nanko phela ngafundela ukwelapha ngaphansi kolwandle. Konke engakufundayo ngokwelapha angikufundiswanga muntu, kodwa kulenyoka eyayingifundisa konke.
“Yikho lapho-ke okwaqala ubudlelwano bami lezinyoka,” kutsho uNgobese.
Uyise kaNgobese laye kubikwa wayeyinyanga ethenjiweyo esigabeni sakibo.
“Ubaba wabhubha ngomnyaka ka2000 ngahle ngaqala ukwenza umsebenzi wakhe. Wangibusisa ngamandla okwenelisa ukwelapha abantu ngisebenzisa inyoka lomuthi,” nguNgobese lo.
Linyanga yengezelele ngokuthi ilezinye inyoka ezingu-14 kibo eKwaZulu Natal.
Ekwelapheni abantu uNgobese uthe usizwa ngabazukulu bakhe ababili uQwephe Ngobese loNkomane Thuli.
“Abafana laba bangisiza ekulungiseni imithi yami kunye lokugcina inyoka lezi beziduduza lapho zithukuthele.
“Ngatshengiswa emoyeni ukuthi kumele ngihambe ilizwe lonke ngiselapha abantu. Okwamanje sengike ngafika eCape Town, Bloemfontein leMpumalanga,” kutsho uNgobese eziqhenya. — Ubulembu
Online Reporter